मोबाईल चोर गजाआड; लाखोंचा मुद्देमाल जप्त

। पनवेल । वार्ताहर ।
रस्त्यावरून मोबाईलवर बोलत जाणार्‍याच्या हातातील मोबाईल हिसकावून पळ काढणार्‍या तीन आरोपींच्या मुसक्या आवळण्यात मध्यवर्ती कक्ष गुन्हे शाखा, नवी मुंबईच्या पथकाला यश आले आहे. या मोबाईल चोरीप्रकरणी पोलिसांनी तीन आरोपींना कोपरखैरणे येथून अटक केली आहे. त्यांच्याकडून 1 लाख 33 हजारांचा मुद्देमाल पोलिसांनी जप्त केला आहे. या तिघांच्या टोळीने नवी मुंबई परिसरातील नेरुळ, एपीएमसी, वाशी, तुर्भे आणि एनआरआय पोलीस ठाण्याच्या हद्दीत मोबाईल चोरी केल्याचे उघड झाले आहे.

या मिळालेल्या माहितीनुसार, वरिष्ठ पोलीस निरीक्षक विजयसिह भोसले यांच्या मार्गदर्शनाखाली पोलिसांनी कोपरखैरणे डी मार्ट परिसरात सापळा रचला होता. त्यानंतर काही अज्ञात इसम या परिसरात संशयरित्या फिरत असल्याचे पोलिसांना आढळून आले होते. या संशयितांची चौकशी केल्यानंतर ते उडवाउडवीचे उत्तर देऊ लागले होते. त्यामुळे पोलिसांचा संशय अधिक बळावला. त्यांनी त्यांना चौकशीसाठी ताब्यात घेतले असता मोबाई चोरीची कबुली दिली. आकाश कांबळे (22), सिद्धेश शौर्य (26) दोघेही रा. कोपरखैरणे आणि इम्रान शेख, रा. शिवूड-नेरुळ अशी पकडलेल्या आरोपींची नावे आहेत. या आरोपीकडून जवळपास 1 लाख 33 हजाराचा ऐवज आरोपींकडून पोलिसांनी जप्त केला आहे. या मध्ये मोबाईल आणि दुचाकीचा समावेश आहे.