एमआयडीसीच्या विरोधात मोर्चा

पाच हजार शेतकरी अलिबागेत धडकणार
डोलवी परिसरातील भूसंपादनाला विरोध
पेण | प्रतिनिधी |
पेण तालुक्यातील प्रस्तावित डोलवी औद्योगिक विकास प्रकल्पासाठी महाराष्ट्र राज्य औद्योगिक विकास महामंडळामार्फत भूसंपादन होणार आहे. या भूसंपादनाच्या विरोधात येथील शेतकरी गुरुवारी (16 डिसेंबर) सकाळी 11 वाजता शेकाप सरचिटणीस आ.जयंत पाटील यांच्या मार्गदर्शनाखाली आणि माजी आमदार धैर्यशील पाटील यांच्या उपस्थितीत 5 हजार संख्येने शेतकरी जिल्हाधिकारी कार्यालय,अलिबाग येथे मोर्चाने धडकणार आहेत.
पेण तालुक्यातील डोलवी औद्योगिक विकास क्षेत्रासाठी काराव, गडब, डोलवी, वडखळ, बोरी ग्रामपंचायत परिसरातील बेणेघाट, कोलवे, वावे, डोलवी, खारकारावी, काराव, खारमांचेळा, खारघाट, खारचिर्बी, खारजांभेळा, खारढोंबी या गावातील 2120 एकर जागा संपादन करण्याचे ठरवले आहे. त्या प्रकारच्या नोटीसा देखील प्रांत्त कार्यालयातून काढण्यात आलेल्या आहेत. 418 एकर जे.एस.डब्ल्यू आणि 165 एकर सरकारी जमीन वगळता 1537 महाराष्ट्र शासनाने नियोजित डोलवी औद्योगिक प्रकल्पासाठी सुमारे 2100 एकर जमिनीसाठी अधिसूचना काढली आहे .सदर च्या जमिनीची मागणी जेएसडब्लु स्टील डोलवी – पेण कंपनीने केल्याप्रमाणे महाराष्ट्र राज्य औद्योगिक विकास महामंडळामार्फत भूसंपादन कायद्याअंतर्गत पास थ्रू पद्धतीने दिली जाणार आहे. या प्रक्रियेलाच येथील शेतकर्‍यांचा विरोध आहे.
या विरोधात काढण्यात येणार्‍या मोर्चा संदर्भात कशाप्रकारे नियोजन केले. याची माहिती माजी आमदार धैर्यशील पाटील यांना त्यांच्या निवासस्थानी जाऊन शेतकर्‍यांच्या शिष्ठ मंडळानी दिली.या मोर्चाची सुरूवात अलिबाग कृषीवल कार्यालया समोरून आ.जयंत पाटील यांच्या मार्गदर्शनाखाली सकाळी 11 वाजता सुरू होणार आहे.

शेतकर्‍यांच्या हितासाठी शेतकरी कामगार पक्ष पूणर्र् शक्तीने गुरुवारी निघणार्‍या मोर्चामध्ये सहभागी होणार आहे. कासू विभागातून मोठया ताकतीशी शेतकरी मोर्चात सहभागी होऊन जिल्हाधिकार्‍यांच्या मार्फत सरकार लादत असलेला प्रकल्प मान्य नसल्याचे म्हणणे शासनापर्यत पोहोचवणार आहेत.
धैर्यशील पाटील, माजी आमदार