किशोर-किशोरी मुंबई जिल्हा अजिंक्यपद खो-खो स्पर्धा

सरस्वती मंदिर, ओम साईश्‍वर अजिंक्य

। मुंबई । प्रतिनिधी ।

मुंबई खो-खो संघटनेच्या मान्यतेने महाराष्ट्र अ‍ॅमॅच्युअर स्पोर्ट्स असोसिएशनतर्फे 14 वर्षांखालील किशोर-किशोरी मुंबई जिल्हा अजिंक्यपद खो-खो स्पर्धा माटुंगा येथील ओम समर्थ भारत व्यायाम मंदिर येथे संपन्न झाल्या. या स्पर्धेच्या अंतिम फेरीच्या सामन्यात किशोरींमध्ये ओम साईश्‍वर सेवा मंडळाने, तर किशोरांमध्ये सरस्वती मंदिर हायस्कूलने अजिंक्यपद मिळवले आहे.

या स्पर्धेतील किशोरांच्या अंतिम सामन्यात सरस्वती मंदिर हायस्कूलने सलग दोन अजिंक्यपद विजेत्या असलेल्या ओम साईश्‍वर सेवा मंडळावर 8-6 असा दोन गुणांनी निसटता विजय मिळवला आहे. या सामन्याच्या पहिल्या डावात सरस्वतीच्या प्रथमेश तर्पेने ओम साईश्‍वरच्या अधिराज गुरवला अचानक हल्ला करून बाद केल्याने व श्‍लोक जाधवला वरून गुप्ताने अवघ्या 10 सेकंदात बाद केल्याने सामन्यात चुरस निर्माण झाली होती.

या सामन्यात सरस्वती मंदिर हायस्कूलच्या वरून गुप्ता, प्रथमेश तर्पे, महेक आदवडे यांनी सरस्वतीला विजय खेचून आणून दिला. ओम साईश्‍वरच्या अधिराज गुरव, श्राथीक गामी, आरव साटम, अर्णव राणे यांनी दिलेली लढत व्यर्थ गेली व त्याचबरोबर ओम साईश्‍वर सेवा मंडळाची अजिंक्यपद मिळवण्याची हॅट्रिकसुध्दा हुकली आहे.

किशोरींच्या अंतिम सामन्यात ओम साईश्‍वर सेवा मंडळाने श्री समर्थ व्यायाम मंदिराला जोरदार टक्कर देत एकतर्फी विजय साजरा केला व पहिल अजिंक्यपद खिशात घातले आहे. ओम साईश्‍वरने श्री समर्थचा 10-4 असा 1 डाव व 6 गुणांनी धुव्वा उडवत विजेतेपदावर नाव कोरले आहे. सुरवाती पासूनच ओम साईश्‍वरच्या खेळाडूंनी जोरदार खेळ करत श्री समर्थच्या खेळाडूंना डोकवर काढण्याची जरासुद्धा संधी दिली नाही. ओम साईश्‍वरच्या कादंबरी तेरवणकरने आणि आर्या जाधवने आक्रमणात 1 खेळाडू बाद केला. यशस्वी कदमने श्री समर्थच्या विजयाच्या आशेवर पाणी फिरवले.

स्पर्धेतील विजेत्या पहिल्या चार संघांना अनुक्रमे रु. 7 हजार, 5 हजार, 3 हजार, 2 हजार व चषक देऊन गौरवण्यात आले. तर, सर्वोत्कृष्ट संरक्षक- प्रथमेश तर्पे (सरस्वती), सोनम शेलार (श्री समर्थ), सर्वोत्कृष्ट आक्रमक- महेक आदवडे (सरस्वती), आर्या आचरेकर (ओम साईश्‍वर), अष्टपैलू- अधिराज गुरव (ओम साईश्‍वर), कादंबरी तेरवणकर (ओम साईश्‍वर) यांना मिळाले आहे.

या स्पर्धेचा बक्षीस वितरण समारंभ मा.आ. नितीन सरदेसाई यांच्या हस्ते संपन्न झाला. यावेळी ओम समर्थ भारत व्यायाम मंदिराचे विश्‍वस्त उन्मेश नरवणे, मुंबई खो-खो संघटनेचे अध्यक्ष अ‍ॅड. अरुण देशमुख, उपाध्यक्ष बाळ तोरसकर, कार्याध्यक्ष सुधाकर राऊळ, कार्योपाध्यक्ष विकास पाटील, खजिनदार डलेश देसाई, प्रमुख कार्यवाह सुरेंद्र विश्‍वकर्मा, प्रशिक्षक नितीन पाष्टे आदी उपस्थित होते.