। नवी दिल्ली । वृत्तसंस्था ।
इंडियन प्रीमिअर लीगच्या 2023च्या 16व्या मोसमात मुंबई इंडियन्सने अखेर विजयाला गवसणी घातली आहे. आयपीएलच्या यंदाच्या मोसमात मुंबई इंडियन्सचा हा पहिलाच विजय आहे.रोहित शर्माने केलेल्या कर्णधाराला साजेशा खेळी केली. 45 चेंडूंमध्ये सहा षटकार चार चौकार लगावत 65 धावा केल्या. पण रोहित शर्मा बाद झाल्यानंतर सामना निर्णायक वळणावर येऊन ठेपला. पण टीम डेव्हिड आणि कॅमेरून ग्रीन यांनी डाव सावरत मुंबईला विजय मिळवून दिला. शेवटच्या क्षणी सामना जिंकवून देणार्या कॅमरुन ग्रीन यांने या विजयाचे रहस्य उघड केले आहे.
मुंबई इंडियनन्सने दिल्ली कॅपिटल्सवर सहा गड्यांनी मात करत विजय मिळवला. मुंबईचा हा यंदाच्या आयपीएलमधील पहिलाच विजय ठरला. दिल्लीला मात्र सलग चौथ्या पराभवाला सामोरे जावे लागले. प्रथम फलंदाजी करताना दिल्लीने मुंबईसमोर 173 धावांचे लक्ष्य ठेवले होते. रोहित बाद झाल्यानंतर मुंबईला 19 चेंडूंत 30 धावा हव्या होत्या. त्यानंतर टीम डेव्हिड आणि कॅमेरून ग्रीन यांनी मुंबईचा डाव सावरला. अखेरच्या षटकात मुंबईला पाच धावा हव्या होत्या. नॉर्कियाच्या दुसर्याच चेंडूवर मिडविकेटला डेव्हिडचा झेल मुकेशकुमारने सोडला. पहिल्या पाच चेंडूंत ग्रीन-डेव्हिड यांना चारच धावा घेता आल्या. त्यामुळे अखेरच्या चेंडूवर मुंबईला दोन धावा हव्या होत्या. डेव्हिडने चेंडू मारला. पहिली धाव घेतल्यानंतर, डेव्हिडने डाइव्ह मारूनच दुसरी धाव पूर्ण केली आणि मुंबईने विजय मिळवला.
शेवटच्या चेंडूवर दोन धावा काढत विजय मिळवून देणार्या कॅमरुन ग्रीनने हे कसं शक्य केलं हे सांगितलं आहे. सामना लवकर संपेल अशी आम्हाला अपेक्षा होती. पण अखेर आम्हीच यात बाजी मारली याचा आम्हाला आनंदही आहे. मला शेवटच्या चेंडूवर कोणतंही दडपण नको होते. म्हणून मी आधी हेल्मेट काढले. शेवटच्या चेंडूवर दोन धावा होऊ शकतात याची मला खात्री होती आणि तसेच घडले, असं कॅमरुन यांनी म्हटलं आहे. दरम्यान, कॅमरून शेवटच्या क्षणी मोठा फटका खेळू शकतो, अशी अपेक्षा होती. मात्र, त्याने कोणतीही रिस्क न घेता शेवटच्या चेंडूवर दोन धावा घेत विजय मिळवून दिला.
मी फलंदाजीसाठी मैदानात गेल्यानंतर 2-3 चौकार लगावण्याचा प्रयत्न केला. मात्र धावपट्टीवर दडपण होतं म्हणून मी सावधगिरीने खेळायचा निर्णय घेतला. पण हा सामना खेळणं माझ्यासाठी मजेदार होतं, असं कॅमरून याने म्हटलं आहे.