रायगड : खास प्रतिनिधी
मुंबईतील रिल स्टारचा माणगावमध्ये 300 फूट खोल दरीत कोसळून मृत्यू झाला आहे. माणगावच्या कुंभे धबधबा येथे ही घटना घडली आहे. व्यवसायाने चार्टर्ड अकाऊंटंट आणि प्रसिद्ध सोशल मीडिया इन्फ्ल्यूएन्सर असलेल्या तरूणीचा रिल बनवण्याच्या नादात जीव गेला आहे. पर्यटकांनी आपल्या जीवाची काळजी घ्यावी असे आवाहन जिल्हा प्रशासन केले आहे.
मुंबई येथील चार्टर्ड अकाउंटेंट असेलेली 27 वर्षीय तरुणी आनवी कामदार ही आपल्या मित्र मैत्रिणींसोबत 16 जुलै रोजी प्रसिद्ध असलेल्या कुंभे येथील जीवघेण्या कड्यावर इंस्टाग्राम रील बनवण्यासाठी आली होती. परंतु तिचा हा प्रवास आणि रील हा दुर्दैवाने तिच्या जीवावर बेतून तिच्या जीवनाचा शेवटचा प्रवास ठरला आहे.
कड्याच्या टोकावरील अरुंद आणि निसरड्या रस्त्यावरून जात असताना तिचा पाय घसरून ती 300 फूट खोल दरीत पडली. तिच्या सोबत असलेल्या मित्र मैत्रिणींनी ही माहिती जवळील माणगांव पोलीस स्थानकात दिली. माणगांवचे वरिष्ठ पोलीस निरीक्षक निवृत्ती बोराडे यांनी त्वरित घटनास्थळी धाव घेत जवळच्या सर्व बचाव पथकांना बोलावले. जखमी अवस्थेत असलेल्या अनविला स्ट्रेचरसह रोप च्या सहाय्याने वर ओढून काढले. यावेळी तिचा श्वास हळुवार चालू होता त्यामुळे तात्काळ रुग्णवाहिकेतून तिला माणगांव उपजिल्ह्या रुग्णालयाकडे नेहण्यात आले परंतु येथे पोहोचण्यापूर्वीच आनवीचे प्राण गेले असल्याचे डॉक्टरांकडून सांगण्यात आले.