। नवी दिल्ली । वृत्तसंस्था ।
पंतप्रधान नरेंद्र मोदींच्या लोकप्रियतेत घट झाल्याचे दावे केले जात असतानाच अमेरिकेच्या एका संस्थेने केलेल्या सर्वेक्षणात मोदी जगातील लोकप्रिय नेते ठरले आहे. त्यांनी जगभरातील 13 नेत्यांना मागे टाकत ही लोकप्रियता मिळवली आहे. यामध्ये अमेरिकेचे राष्ट्राध्यक्ष जो बायडेन पाचव्या स्थानी आहेत.
पंतप्रधान नरेंद्र मोदींची लोकप्रियता अमेरिका, युके, रशिया, ऑस्ट्रेलिया, कॅनडा, ब्राझील, फ्रान्स आणि जर्मनीसह 13 देशांमधील नेत्यांच्या तुलनेत जास्त असल्याचं सर्व्हेक्षणातून समोर आलं आहे. अमेरिकतील ‘ग्लोबल लीडर अ‍ॅप्रूव्हल ट्रॅकर मॉर्निंग कन्सल्ट’ने हे सर्वेक्षण केलं होतं. या सर्वेक्षणात मोदींना 70 टक्के गुणांकन मिळालं आहे. दर आठवड्याला या सर्वेक्षणाचा डेटा अपडेट केला जातो. पंतप्रधान मोदी मेक्सिकोचे अध्यक्ष अँड्रेस मॅन्युएल लोपेझ ओब्राडोर, इटालियन पंतप्रधान मारियो ड्रॅगी, जर्मन चान्सलर अँजेला मर्केल, अमेरिकेचे अध्यक्ष जो बायडेन, ऑस्ट्रेलियाचे पंतप्रधान स्कॉट मॉरिसन, कॅनडाचे पंतप्रधान जस्टिन ट्रुडो, यूकेचे पंतप्रधान बोरिस जॉन्सन आणि ब्राझीलचे अध्यक्ष जैर बोल्सोनारो यांच्या पुढे आहेत.
25 टक्के प्रौढांनी नाकारलं
पंतप्रधान नरेंद्र मोदी यांची लोकप्रियता प्रौढांमध्ये सर्वात कमी असल्याचं या सर्वेक्षणातून समोर आलंय. भारतात सर्वेक्षण केलेल्या प्रौढांपैकी 25 टक्के लोकांनी मोदींना नाकारलंय.