मोहोपाड्यात सुसज्ज रुग्णालयाची गरज

| रसायनी | वार्ताहर |

रसायनी पाताळगंगा हे नावारूपास आलेले ठिकाण आहे. शहरालगत दांड-रसायनी, मुंबई-पुणे द्रुतगती महामार्ग असून, या महामार्गावरून हजारो वाहनांची वाहतूक होत असते. प्रचंड वाहतुकीमुळे या महामार्गावर नेहमी अपघात होत असतात. अपघात झाल्यानंतर गंभीर जखमींना पुढील उपचारासाठी मुंबईला न्यावे लागत आहे. या प्रवासात बराचसा वेळ वाया जात असल्याने काही वेळेला रूग्णाला रस्त्यातच आपला प्राण गमवावा लागत असतो. यासाठी मोहोपाडा येथे सुसज्ज अशा शासकीय रुग्णालयाची आवश्यकता आहे.

मोहोपाडा येथे आरोग्य उपकेंद्र सन 2009 मध्ये उभारण्यात आले आहे. या आरोग्य उपकेंद्रात आरोग्यसेवक सेविका व डॉक्टर रूग्णांची समस्या जाणून घेत आहेत. मोहोपाडा उपकेंद्राच्या हद्दीत तळेगाव, तळेगाववाडी, पानशिल, शिवनगरवाडी, शिवनगर, चांभार्ली, मोहोपाडा, नवीन पोसरी, शिंदीवाडी, रिसवाडी, आंबिवली आदींसह आणखी सात ते आठ गावांचा समावेश होत असून, या गावात आरोग्य सेवक हे घरोघरी फिरून आरोग्यविषयक जनजागृती करीत असून त्यांच्यावरील कामाचा ताण वाढत असल्याचे त्यांचे म्हणणे आहे.

दरम्यान, मोहोपाडा येथील उपकेंद्रात रुग्णांना वेळेवर उपचारासाठी योग्य व्यवस्था नसल्याने परिसरातील रुग्ण चौक, लोहोप, अजिवली येथील शासकीय रुग्णालयात उपचारासाठी जात असल्याचे चित्र पहावयास मिळत आहे. उपकेंद्रात येणार्‍या रुग्णांची संख्या फार कमी आहे. येथील सेविका प्रसूती करीत असून, येथे अनेक गरीब व गरजू महिलांचे बाळंतपण होत आहे. सर्पदंश झाल्यास तात्काळ औषधोपचाराची सुविधा येथे उपलब्ध नसल्याने रुग्णांना लोहोप, चौक आरोग्य केंद्रात जावून उपचार घ्यावे लागत आहेत. यामुळे तात्काळ उपचार न मिळाल्याने जीव गमावण्याची वेळ अनेक रुग्णांवर ओढवली आहे. वासांबे-मोहोपाडा ग्रामपंचायतीच्या हद्दीत 50 हजारांपेक्षा जास्त लोकसंख्या असून, येथील आरोग्य उपकेंद्र पाहता आरोग्य सेवक, सेविका व डॉक्टरांची कमतरता भासत आहे. शासनाच्या निर्णयानुसार पाच हजार लोकसंख्येला एक आरोग्य सेवक व दोन डॉक्टर अशी सोय असतानाही येथील लोकसंख्या पाहता परिसरात सुसज्ज प्राथमिक आरोग्य केंद्र असावे याकरिता सन 2012 मध्ये परिसरातील शिवनगर येथे प्राथमिक आरोग्य केंद्र उभारणीसाठी वासांबे मोहोपाडा ग्रामपंचायतीने जागेची व्यवस्था शिवनगर वाडी येथे करून दिली असून, सदर प्रस्ताव काही वर्षांपासून जिल्हा परिषदेकडे धूळ खात पडून आहे.