। अलिबाग । विशेष प्रतिनिधी ।
जिल्हा रुग्णालयाच्या दुरावस्थचे दशावतार थांबायला नाव घेत नाहीत. इमारतीच्या पीओपी तसेच स्लॅबच्या नादुरुस्तीमुळे शस्त्रक्रिया गृहासह ठिकठिकाणी लागलेल्या गळतीमुळे रुग्णांचे हाल होत आहेत. त्यात इमारतीसोबतच बांधला गेलेला रॅम्प धोकादायक ठरवून पाडण्यात आल्यानंतर तो उभारण्याचे काम अजून सुरुच झालेले नाही. तर दुसरीकडे मुख्य प्रवेशद्वारासमोरील स्लॅब अर्धवट पाडण्यात आला आहे. त्यामुळे एकमेव तात्पुरते अरुंद प्रवेशद्वार असलेल्या अपघात विभागाजवळून रुग्णांची ने-आण करावी लागत आहे. त्यामुळे रुग्ण आणि त्यांच्या नातेवाईकांच्या हालाची पराकाष्ठाच सुरु आहे. दरम्यान, सार्वजनिक बांधकाम विभागाकडे संपर्क साधला असता रॅम्प आणि प्रवेशद्वाराचे काम मार्च पर्यंत पुर्ण होणार असल्याचे सांगण्यात आले.
प्रत्येक दिवशी वेगवेगळ्या कारणांमुळे चर्चेत येत असलेल्या अलिबाग येथील जिल्हा रुग्णालयाची जीर्ण इमारतीमुळे रुग्णांचे हाल होत आहेत. रुग्णालयातील इमारतीचा स्लॅब कोसळणे, गळती लागणे अशा गोष्टीं घडत आहेत. जिल्हा रुग्णालयाची इमारत 1980 साली बांधण्यात आली आहे. या दोन मजली इमारतीत सध्या अपघात विभाग, क्ष-किरण विभाग, सोनोग्राफी, डायलेसिस विभाग, स्त्री आणि पुरष सर्जिकल वॉर्ड, शस्त्रक्रीया विभाग, अतिदक्षता विभाग, औषध भंडार, कोव्हिड वॉर्ड आणि जळीत विभाग, नवजात बालक संगोपन विभाग, तसेच टेलिमेडिसीन कक्ष कार्यान्वयित आहेत. रुग्णांची वाढती संख्या आणि विभाग लक्षात घेतले तर इमारत आता अपुरी पडायला लागली आहे. त्यामुळे या इमारतीत शेकडो जणांचा नेहमी राबता सुरू असतो.
इमारतीच्या बांधकामाला 40 वर्ष पूर्ण झाली आहेत. त्यामुळे इमारत जीर्ण आणि धोकादायक बनत चालली आहे. इमारतीच्या देखभाल दुरुस्तीचा खर्चही मोठ्या प्रमाणात वाढला आहे. गेल्या आठ वर्षात इमारतीवर तब्बल 12 कोटी रुपये येवढा निधी खर्च करण्यात आला आहे. मात्र इमारतीची परिस्थिती काही सुधारलेली नाही. अनेक ठिकाणी इमारतीला गळती लागली आहे. स्लॅब पडण्याच्या घटनाही घडल्या आहेत. काही ठिकाणी टेकू लावण्याची वेळही आली आहे. त्यामुळे ही इमारत पाडून नवीन इमारत बांधण्याची मागणी केली जात आहे. सन 2012 मध्ये या इमारतीचे स्ट्रक्चरल ऑडिट करण्यात आले होते. त्यावेळी इमारत धोकादायक झाली असून व्यापक दुरुस्तीची गरज असल्याचा अहवाल स्ट्रक्चरल ऑडिट करणार्या संस्थेने दिला होता. तर आरोग्य विभागाने जुन्या इमारतीची दुरुस्ती करण्याऐवजी नवीन इमारत बांधून द्यावी, अशी मागणी बांधकाम विभागाकडे केली होती. मात्र बांधकाम विभागाने आरोग्य विभागाच्या सुचनेकडे दुर्लक्ष करून जुन्याच इमारतीच्या दुरुस्तीवर भर दिला होता. पुन्हा नव्याने अलिकडेच या इमारतीचे स्ट्रक्चरल ऑडिट करण्यात आले. त्यानंतर देखील इमारतीच्या दुर्दैवाचे दशावतार थांबायला तयार नाहीत.
आज ही इमारत जीर्ण आणि धोकादायक झाली आहे. अलिबाग येथे जिल्हा रुग्णालयाच्या आंतर रुग्णालय विभागाचे बांधकाम 1980 साली करण्यात आले आहे. म्हणजेच इमारतीचे बांधकाम पूर्ण होऊन 40 वर्ष झाली आहेत. इमारतीत छत कोसळण्याच्या घटना घडल्या आहेत. त्यात जिल्हा रुग्णालयाच्या बांधकामावेळीच बांधण्यात आलेला जिना (रॅम्प) धोकादायक म्हणून पाडण्यात आला. मात्र त्याचवेळी बांधण्यात आलेली इमारत मात्र अजूनही डागडूजी करुनच वापरली जात आहे. सदर रॅम्पमुळे रुग्ण आणि नातेवाईकांना उपचारासाठी मुख्य प्रवेशद्वार तसेच अपघात विभागाजवळ तात्पुरत्या स्वरुपात करण्यात आलेल्या दरवाजाने रुग्णालयात जावे लागत आहे. त्यात दिवाळीमध्ये मुख्य प्रवेशद्वाराचे काम सुुरु करण्यात आले. प्रवेशद्वाराबाहेरील स्लॅब पाडण्याचे काम सुरु करण्यात आले होते. मात्र दिवाळीनंतर सदर कामगार गेले ते परतलेच नाहीत. त्यामुळे सदर प्रवेशद्वाराचे पाडण्याचेच काम अर्धवट आहे. त्यामुळे रुग्णांना अरुंद असलेल्या अपघात विभागाजवळील दरवाजाने ये-जा करावी लागत आहे. या संदर्भात सार्वजनिक बांधकाम विभागाचे कार्यकारी अभियंता जगदिश सुखदेवे यांच्याशी संपर्क साधला असता त्यांनी सदर काम सुरु असून येत्या मार्चपर्यंत काम पुर्ण होईल असे सांगितले.