87 धावांनी खणखणीत विजय
| कोलकाता | वृत्तसंस्था |
विश्वचषक स्पर्धेत लिंबूटिंबू म्हणून गणना होणाऱ्या नेदरलँड्सने शनिवारी कोलकाता इथे झालेल्या लढतीत बांगलादेशला नमवले. काही दिवसांपूर्वी नेदरलँड्सने दक्षिण आफ्रिकेला हरवण्याची किमया केली होती. या पराभवासह बांगलादेशसाठी बाद फेरीचा मार्ग जवळजवळ बंद झाला आहे. 6 सामन्यांपैकी केवळ एका सामन्यात त्यांना विजय मिळवता आला आहे. नेदरलँड्सने 6 पैकी 2 सामन्यात विजय मिळवत संघर्ष सुरू ठेवला आहे.
230 लक्ष्याचा पाठलाग करताना बांगलादेशच्या फलंदाजांनी आततायी फटके खेळत फलंदाज गमावले. सलामीवीर लिट्टन दास आणि तान्झिड हसन हे सहाव्या षटकापर्यंत माघारी परतले. तिसऱ्या क्रमांकावर बढती देण्यात आलेल्या मेहदी हसन मिराझने 35 धावांची संयमी खेळी केली. नझमुल होसेन शंटो 9 धावा करुन बाद झाला. अनुभवी शकीब उल हसनही मोठी खेळी करु शकला नाही. यष्टीरक्षक फलंदाज मुशफकीर रहीम व्हॅन मीकरनच्या गोलंजाजीवर त्रिफळाचीत झाला. मीकरनने या तिघांना बाद करत बांगलादेच्या डावाला खिंडारच पाडले . तळाच्या फलंदाजांनी थोडा प्रतिकार केला पण तो अपुराच ठरला. महमदुल्लाने आणि मुस्ताफिझूर रहमान यांनी प्रत्येकी 20 धावा केल्या. नेदरलँड्सतर्फे पॉल व्हॅन मीकरनने चार विकेट्स पटकावल्या. बॅस डी लीडने 2 तर आर्यन दत्त, लोगन व्हॅन बीक, कॉलिन ॲकरमन यांनी एकेकगडी बाद करीत मीकरनला चांगली साथ दिली. बांगलादेशच्या एकाही फलंदाजाला अर्धशतकही झळकावता आले नाही. मीकरनला सामनावीर पुरस्काराने गौरवण्यात आले.
कोलकाता इथे झालेल्या यंदाच्या विश्वचषकाच्या पहिल्याच लढतीत नेदरलँड्सने संस्मरणीय विजय मिळवला. नाणेफेक जिंकून नेदरलँड्सने फलंदाजीचा निर्णय घेतला. पण बांगलादेशच्या गोलंदाजांनी त्यांची अवस्था 2/4 अशी अवस्था केली. यानंतर वेस्ले बारेसी आणि कॉलिन ॲकरमन यांनी डाव सावरला. मात्र या दोघांना लागोपाठ बाद करत बांगलादेशने नेदरलँड्सवरचे दडपण वाढवले. नेदरलँड्सचा कर्णधार स्कॉट एडवर्ड्सने स्वत:ला फलंदाजीत बढती घेतली. त्याने 68 धावांची संयमी खेळी करत डावाला आकार दिला. सायब्रँड एंजेलब्रेच्टने 35 धावा करत त्याला चांगली साथ दिली. या दोघांनी सहाव्या विकेटसाठी 78 धावांची महत्त्वपूर्ण भागीदारी केली. ही जोडी फुटल्यानंतर नेदरलँड्सची पुन्हा घसरगुंडी उडाली आणि त्यांचा डाव 229 धावांतच आटोपला. बांगलादेशतर्फे शोरिफुल इस्लाम, तास्किन अहमद, मुस्ताफिझूर रहमान, मेहदी हसन यांनी प्रत्येक 2 गडी बाद केले.