रोहित-विराटला दाखवला नेटकर्‍यांनी ‘आरसा’

। नवी दिल्ली । वृत्तसंस्था ।

घरच्या मैदानात मागील 12 वर्षांत सलग 18 मालिका विजयासह दिमाखदार रेकॉर्ड नावे घेऊन मिरवणार्‍या टीम इंडियाला मोठा धक्का बसला आहे. न्यूझीलंडच्या संघाने बंगळुरु पाठोपाठ पुण्याचं मैदान मारत भारतीय भूमित पहिली वहिली कसोटी मालिका जिंकली. मायदेशातील भारताचा विजयी रथ पाहुण्या संघाने रोखला.
टीम इंडियाची आण बाण आणि शान असलेल्या रोहित शर्मा आणि विराट कोहली यांनाही लौकिकाला साजेसा खेळ करता आला नाही. भारतीय संघाच्या लाजिरवाण्या पराभवानंतर आता बॅटिंगच्या मुद्यावरून या दोघांना सोशल मीडियावर ट्रोल करण्यात येत आहे. क्रिकेटचा देव अर्थात सचिन तेंडुलकरचा दाखला देत नेटकर्‍यांनी विराट कोहली आणि रोहित शर्माची शाळा घेतली आहे.

न्यूझीलंड विरुद्धच्या पुण्यातील कसोटी सामन्यात विराट कोहली दोन्ही डावात फिरकीपटू मिचल सँटनरच्या जाळ्यात फसला. पहिल्या डावात तर तो फुलटॉस चेंडूवर बोल्ड झाला. विराट कोहलीची नेहमीच तेंडुलकरसोबत तुलना केली जाते. एका नेटकर्‍याने मिचल सँटनर विरुद्ध कोहलीचा फ्लॉप शो आणि दिवंगत आणि महान फिरकीपटू शेन वॉर्न विरुद्धचा सचिन तेंडुलकरचा हिट शो दाखवणारा व्हिडिओ शेअर करत यापुढे चुकूनही विराटची तुलना सचिनशी करु नका, असे मत व्यक्त केल्याचे दिसून येते.