शिवतिर्थावर नव्याने क्रिकेटपटू घडणार

प्रवीण आमरे, ‌‘रोझ मर्क’ यांच्या संयुक्त विद्यमाने; विनामूल्य प्रशिक्षण देण्याची योजना

| मुंबई | विनायक दळवी |

सचिन तेंडूलकर, अजित वाडेकर, विजय मांजरेकर, सुभाष गुप्ते, श्रेयस अय्यर, शार्दुल ठाकूर यांसारखे क्रिकेटपटू मुंबईच्या क्रिकेट पंढरीत म्हणजेच शिवतीर्थावर घडले आहेत. त्यामुळे त्यांच्याप्रमाणेच मुंबईतील शिवाजी पार्क जिमखान्यावर नव्याने क्रिकेटपटू तयार करण्याची संकल्पना भारताचे माजी कसोटीपटू व सुप्रसिद्ध प्रशिक्षक प्रवीण अमरे यांनी सोमवारी (दि.22) पत्रकारांसमोर मांडली. यावेळी शिवाजी पार्क जिमखाना आणि रोझ मर्क क्रिकेट अकॅडमी यांच्या संयुक्त विद्यमाने तीन वेगवेगळ्या वयोगटातील गुणवत्तावान क्रिकेटपटूंना अत्याधुनिक तंत्रज्ञान आणि अनुभवी प्रशिक्षक यांच्याद्वारे विनामूल्य प्रशिक्षण देण्याची योजना जाहीर करण्यात आली आहे.

भारताचे माजी कसोटीपटू, सुप्रसिद्ध प्रशिक्षक तथा शिवाजी पार्क जिमखान्याचे अध्यक्ष प्रवीण अमरे यांनी सोमवारी पत्रकारांसमोर एक संकल्पना मांडली. त्यांनी सांगितले की, 12 ते 14 वर्षे, 14 ते 16 वर्षे आणि 16 ते 19 वर्षे अशा तीन वयोगटातील गुणवत्तावान क्रिकेटपटूंना अत्याधुनिक तंत्रज्ञान आणि अनुभवी प्रशिक्षकांद्वारे विनामूल्य प्रशिक्षण देण्याची योजना आखण्यात आली आहे. प्रत्येक वयोगटात 16 असे एकूण तीन वयोगटात 48 क्रिकेटपटू या उच्च दर्जाच्या विनामूल्य प्रशिक्षणासाठी निवडले जाणार असल्याचे त्यांनी सांगितले. तसेच, प्रवीण अमरे यांच्यासह विनय दांडेकर व सिद्धार्थ भाटकर या प्रशिक्षकांचे मार्गदर्शन प्रशिक्षणार्थींना लाभणार आहे. शिवाय या प्रशिक्षण प्रक्रियेमध्ये माजी रणजीपटू व प्रशिक्षक भरत कर्णिक हे देखील विशेष निमंत्रित म्हणून मार्गदर्शन करणार आहेत, अशी माहिती शिवाजी पार्क जिमखान्याचे सचिव संजीव खानोलकर यांनी पत्रकारांना दिली. तसेच, रोझ मर्क अकॅडमीचे अध्यक्ष उदय तारदाळकर यांनी सांगितले की, भारतीय क्रिकेटच्या भवितव्यासाठी, शिवाजी पार्क जिमखाना सोबतची ही आमची गुंतवणूक सत्कारणी लागणारी आहे. त्यांच्या मार्गदर्शनाखाली तसेच जिमखानाच्या प्रशिक्षकांच्या देखरेखीखाली हे लक्ष साध्य होईल, हा विश्वास त्यांनी व्यक्त केला आहे. त्याचबरोबर रोझ मर्कचे कार्याध्यक्ष पूर्वेश शेलटकर यांनी सांगितले की, मुंबईच्या क्रिकेटचा देदीप्यमान इतिहास आणि नवोदित गुणवत्तेला आकार देण्याची आमची परंपरा ही या योजनेमुळे प्रतिबिंबित होत आहे. म्हणूनच आम्ही एका चांगल्या उपक्रमात सहभागी झालो आहोत, असे सांगितले. ही निवड चाचणी दि. 8 ते 10 जानेवारी दरम्यान मुंबईतील शिवाजी पार्क जिमखाना येथे सकाळी साडेसात वाजता सुरू होणार असल्याचे जिमखाना आणि रोझ मर्क अकॅडमीच्यावतीने सांगण्यात आले आहे.

वेळेत उपस्थित राहण्याचे आवाहन
ही निवड चाचणी तीन वयोगटातील क्रिकेटपटूंसाठी असून 8 जानेवारीला 12 ते 14 वर्षे वयोगटासाठी, 9 जानेवारीला 16 ते 19 वर्षे वयोगटासाठी व 10 जानेवारी रोजी 14 ते 16 वर्षे वयोगटासाठी सकाळी साडेसात वाजता सुरू होणार आहे. यावेळी निवडीसाठी येताना, क्रिकेटच्या पांढऱ्या गणवेशात येणे आवश्यक असून सोबत आधार कार्ड किंवा जन्मतारखेच्या दाखल्यासह खेळाडूंनी थेट मुंबईतील शिवाजी पार्क जिमखाना येथे निर्धारित तारखा आणि वेळेत उपस्थित राहावे, असे आवाहन शिवाजी पार्क जिमखाना आणि रोझ मर्क क्रिकेट अकॅडमीच्यावतीने करण्यात आले आहे. तसेच, ज्या खेळाडूंना ऑनलाइन निवड प्रक्रिया किंवा प्रक्रियेचे फॉर्म भरता येणे शक्य नसेल त्यांना थेट चाचणीच्या दिवशी सकाळी साडेसात वाजता शिवाजी पार्क जिमखान्यावर येऊन आपली नावे शिबिरासाठी नोंदविता येतील, असेही सांगण्यात आले आहे.

शिवाजी पार्क जिमखाना आणि रोझ मर्क यांची ही योजना तीन वर्षांच्या कालावधीसाठी असून, प्रत्येक वर्षी नवीन खेळाडूंना संधी मिळणार आहे. त्यातूनच श्रेयस अय्यर, शार्दुल ठाकूर यांच्यासारखे भारताचे प्रतिनिधित्व करण्याची क्षमता असलेले क्रिकेटपटू निर्माण होतील.

-प्रवीण आमरे,
अध्यक्ष, शिवाजी पार्क जिमखाना