पक्ष विलिनीकरणाच्या बातम्या तथ्यहीनः खा.सुप्रिया सुळें

। मुंबई । प्रतिनिधी ।

दुसऱ्या पक्षात विलीन होण्याच्या बातम्या तथ्यहीन आहेत. कार्यकर्त्यांमध्ये संभ्रम निर्माण करण्याचा हा प्रयत्न सुरू आहे. राष्ट्रवादी काँग्रेस पक्ष हा शरद पवारांच्या नावाने जनतेत जाईल आणि निवडणूक लढवेल, असे राष्ट्रवादी काँग्रेस शरद पवार गटाच्या खासदार सुप्रिया सुळे यांनी स्पष्ट केले.

बुधवारी सकाळपासून शरद पवार गट काँग्रेसमध्ये विलीन होणार असल्याच्या चर्चा सुरू होत्या. त्याबाबत पवार गटाचे नेते मंगलदास बांदल यांनी, तशी चर्चा सुरू असून यासंबंधीचा निर्णय लवकरच सर्वांना कळेल, असे विधान केल्यामुळे या चर्चांना उधाण आले होते. मात्र, खा. सुळे यांनी बांदल यांचा दावा फेटाळत, बांदल यांचा राष्ट्रवादी शरद पवार गटाशी काही संबध नाही. ते आमच्या गटाचे नेते नाहीत, असंही स्पष्ट केलं आहे. पुण्यात आज सकाळी शरद पवार गटाची बैठक झाली. या बैठकीनंतर खा. सुळे यांनी माध्यमांशी संवाद साधला.

सुप्रिया सुळे म्हणाल्या की, मंगलदास बांदल यांच्यावर पक्षाची कोणती जबाबदारी आहे? मला जयंत पाटील यांना विचारावे लागणार आहे. परंतु कोणत्या राष्ट्रवादीसंदर्भात हा विषय आहे. कारण सध्या दोन राष्ट्रवादी आहेत ना? मला याबाबत काही माहीत नाही, असे त्यांनी सांगत हात झटकले. आजच्या बैठकीत पक्षनाव आणि चिन्हाबाबत चर्चा झाली. दुसऱ्या पक्षात विलिन होण्याच्या बातम्या तथ्यहीन आहेत. कार्यकर्त्यांमध्ये संभ्रम निर्णय करण्याचा हा प्रयत्न सुरू आहे. राष्ट्रवादी काँग्रेस पक्ष हा शरद पवारांच्या नावाने जनतेत जाईल आणि निवडणूक लढवेल. शरद पवारांच्या नेतृत्त्वाखाली आम्हाला लढायचं आहे. त्यामुळे सर्वोच्च न्यायालयाने नाव आणि चिन्ह दिलं तर आम्ही आमची स्वतंत्र भूमिका घेऊन विधानसभा आणि लोकसभेत जनतेसमोर जाणार आहोत, असेही खा. सुळे म्हणाल्या.