निकोलस डेव्हिन ‘रिटायर्ड आऊट’

। अँटिग्वा । वृत्तसंस्था ।

टी-20 विश्‍वचषकात शनिवारी (दि.15) रात्री इंग्लंड आणि नामिबिया यांच्यात सामना खेळला गेला. पावसामुळे हा सामना 10-10 षटकांचा झाला आणि यामध्ये इंग्लंडने 41 धावांनी विजय मिळवला. या सामन्यात इंग्लंडने प्रथम फलंदाजी करताना 10 षटकांत 5 गडी गमावून 122 धावा केल्या. प्रत्युत्तरात नामिबियाचा संघ तीन गडी गमावून केवळ 84 धावा करू शकला. अशाप्रकारे डकवर्थ लुईस नियमानुसार इंग्लंडने हा सामना 41 धावांनी जिंकला. या सामन्यात नामिबियाचा स्टार फलंदाज निकोलस डेव्हिन रिटायर्ड आऊट झाला. टी-20विश्‍वचषकाच्या इतिहासात पहिल्यांदाच एखादा फलंदाज अशा प्रकारे बाद झाला आहे.

10 षटकांत 123 धावांच्या लक्ष्याचा पाठलाग करताना मायकल लिंगेनने नामिबियाला चांगली सुरुवात करून दिली. त्याचवेळी दुसर्‍या टोकाला असलेला निकोलस डेव्हलिन त्याच्या शैलीत फलंदाजी करत नव्हता. सहाव्या षटकात डेव्हिन 16 चेंडूत 18 धावा काढून खेळत होता. यामुळे त्यांनी ‘रिटायर्ड आऊट’ होण्याचा निर्णय घेतला. यानंतर त्याच्या जागी डेव्हिड विस क्रीझवर आला. यामुळे टी-20 विश्‍वचषकाच्या इतिहासात पहिल्यांदाच एखादा खेळाडू ‘रिटायर्ड आऊट’ होण्याची वेळ आली आहे.