रेल्वे अपघातात एकाचा मृत्यू

। माणगाव । वार्ताहर ।
माणगावपासून नऊ कि.मी. अंतरावर असणार्‍या इंदापूर रेल्वे स्टेशनच्या हद्दीत एका 65 वर्षीय इसमाला रेल्वेची धडक लागून त्याचा मृत्यू झाला. ही घटना दि. 10 एप्रिल रोजी दुपारी 2.30 ते 12 एप्रिल रोजी सकाळी 8.30 वाजण्याच्या सुमारास घडली. या घटनेची खबर गणेश चंदनकुमार भट (31) रा. शिक्षक कॉलनी, तळाशेत-इंदापूर, ता. माणगाव यांनी माणगाव पोलीस ठाण्यात दिली.

या घटनेबाबत माणगाव पोलिसांकडून मिळालेली माहिती अशी की, घटनेतील मयत इसम चमनकुमार काल्लुराम भट (65) सध्या रा. शिक्षक कॉलनी, तळाशेत-इंदापूर, ता. माणगाव यांस दारू पिण्याचे व्यसन होते. ते दारूच्या नशेत इतरत्र फिरत असायचे. त्यांना कोकण रेल्वेची धडक लागून या अपघातात त्यांना गंभीर दुखापती होऊन त्यांचा मृत्यू झाला. या घटनेची माहिती समजताच माणगाव पोलीस ठाण्याचे पोलीस निरीक्षक राजेंद्र पाटील यांनी घटनास्थळी भेट दिली.