अत्याचार प्रकरणात एकाला अटक

| पनवेल । वार्ताहर ।

“से हाय” या डेटिंग अ‍ॅपवरून अल्पवयीन मुली व तरुणींना जाळ्यात ओढून लग्नाचे प्रलोभन दाखवत लैंगिक अत्याचार करणार्‍या एकाला तळोजा पोलिसांनी बलात्कार आणि पोक्सो कलमाखाली अटक केली आहे. सूरजभान सिंग (48) असे त्याचे नाव असून एका अल्पवयीन मुलीसह तीन तरुणींवर त्याने लैंगिक अत्याचार केल्याचे उघड झाले आहे. न्यायालयाने त्याची रवानगी पोलिस कोठडीत केली आहे.

तळोजा फेज-1 मध्ये इस्टेट एजंट म्हणून काम करणारा सूरजभान सिंग हा “से हाय” या डेटिंग अ‍ॅपवरून तरुणींसोबत संपर्क करत होता. त्यानंतर चॅटिंगद्वारे त्यांच्या कुटुंबाची माहिती मिळवून निराधार आणि गरीब अल्पवयीन तरुणींना लग्नाचे प्रलोभन दाखवून त्यांच्यावर अत्याचार करत होता. काही महिन्यांपूर्वी ऐरोलीत राहणार्‍या एका 16 वर्षीय मुलीला देखील कॉलेजची फी भरण्याचे प्रलोभन दाखवून अशाच प्रकारे फसवणूक करण्यात आली होती. याप्रकरणी पीडित मुलीने तळोजा पोलिस ठाण्यात तक्रार दाखल केल्यानंतर पोलिसांनी सूरजभान सिंग याला बलात्कारासह पोक्सो कलमाखाली गुन्हा दाखल करून अटक केली आहे. त्याच्यावर खारघर पोलिस ठाण्यात देखील बलात्काराचा एक गुन्हा दाखल आहे.