तीनपदरी पुलावरून एकेरी वाहतूक सुरू

पोलादपूर ते महाड दरम्यान मुंबई ते गोवा महामार्ग

| पोलादपूर | प्रतिनिधी |

महाड ते पोलादपूर दरम्यान मुंबई-गोवा राष्ट्रीय महामार्गावर पांढरे पट्टे रेखाटण्याचे काम गेल्या काही दिवसांपासून प्रगतीपथावर आहे. या दरम्यान चांढवे ते पार्ले, लोहारे या तीन पदरी पुलावरील वाहतूक अचानक एकेरी सुरू झाल्याचे दिसून येत आहे. मात्र, या पुलावरील तडे गेलेल्या काँक्रिटीकरणाकडे महामार्ग बांधकाम विभागाकडून सपशेल दुर्लक्ष केले जात आहे.

मुंबई-गोवा महामार्गांवर चांढवे ते पार्लेदरम्यान ओव्हरब्रिजनंतर टोलनाका असून, त्यापुढे लोहारेपर्यंत तीनपदरी रूंदीचे तीन ओव्हरब्रिज आहेत. गेल्या 15 दिवसांपासून या महामार्गावर पांढरे पट्टे रेखाटण्याचे काम सुरू आहे. या कामा दरम्यान, किमान 500 मीटर आधी वाहन चालकांना पुढे एकेरी पदरावरून वाहतूक सुरू करण्यात आल्याचे कोणतेही सूचना फलक न लावताच ज्या ठिकाणी पट्टे रंगविण्याचे काम सुरू आहे; त्याठिकाणी लाल रंगाचे बॅरीकेट्‌‍स‍ उभारून तसेच एक केशरी रंगाचा इंडिकेटर लॅम्प लावून अचानक एकेरी मार्गिका दिसून वाहनचालकांची त्या एकेरी पदरावरून वाहन नेताना तारांबळ उडत असल्याचे दृश्य दिवसांतून अनेकदा दिसून येत आहे.

काही वेळा या लाल रंगाच्या फायबरच्या बॅरिकेट्‌‍सना वाहनांचा धक्का लागून ते उडविले जात आहेत. चांढवे टोलनाक्यापुढील मुंबई आणि गोव्याकडे जाणाऱ्या दोन्ही तीन पदरी ओव्हरब्रिजवर पांढरे पट्टे रंगविण्याच्या कामामुळे दोन्ही ओव्हरब्रिजवर एकाच मार्गिकेवरून वाहतूक तीन पदरांवरील वाहने अरूंद मार्गिकेवर जाण्यासाठी झुंबड उडाल्यासारखी परिस्थिती अपघाताला निमंत्रण देणारी ठरण्याची शक्यता आहे. या ओव्हरब्रिजवर अनेक दुचाकीस्वारांचे अपघात झाले असून, अनेकांना जीवदेखील गमवावे लागले आहेत.

चारही ओव्हरब्रिजवरील काँक्रिटच्या रस्त्यांना एक ते दोन इंच रूंदीचे सुमारे दोन ते चार मीटर लांबीचे तडे गेले असल्याकडे दुर्लक्ष करून पांढरे पट्टे रंगविण्याच्या कामाला प्राधान्य दिले जात असल्याने स्थानिक नागरिकांना पांढरे पट्टे रंगविल्यानंतर काँक्रीटच्या रस्त्याचे तडे गेलेल्या भागातील कप्पे काढून नव्याने काँक्रिटीकरण करून पुन्हा पांढरे पट्टे रंगविण्याचा दुबार खर्च संबंधित महामार्ग बांधकाम विभागाकडून केला जाईल, अशी उपहासात्मक चर्चा होत आहे.