नवीन वाहने खरेदी करण्याच्या महासभेची मंजूरी
| पनवेल । वार्ताहर ।
पनवेल महानगरपालिका अग्निशमन विभाग अधिक सक्षम करण्याच्या दृष्टीने झालेल्या महासेभेत अग्निशमन विभागसाठी पाच वाहने नव्याने खरेदी करण्याच्या विषयास महासभेने मंजूरी दिली. महापौर डॉ. कविता किशोर चौतमोल यांच्या अध्यक्षतेखाली आद्य क्रांतीवीर वासुदेव बळवंत फडके नाट्यगृह येथे (19 एप्रिल) महासभा घेण्यात आली. यावेळी सीताताई पाटील, आयुक्त गणेश देशमुख, अतिरिक्त आयुक्त तृप्ती सांडभोर, तिलकराज खापर्डे, पालिका अधिकारी व कर्मचारी उपस्थित होते.
एकूण 110 चौ.कि.मी. इतके कार्यक्षेत्र असलेल्या पनवेल महानगरपालिका अग्निशमन विभागामार्फत नागरिकांच्या जीवित व मालमत्तेचे बचावकार्य करण्यासाठी आधुनिक तंत्रज्ञान असलेले फायर फायटींग वाहने असणे अत्यंत गरजेचे आहे. सध्या पनवेल महानगरपालिका क्षेत्रामध्ये विविध वापराच्या उत्तुंग इमारती शॉपिंग मॉल्स, व्यवसायिक, शैक्षणिक वापराच्या इमारती अस्तित्वात असून महाराष्ट्र शासनाने नव्याने मंजुरी दिलेला णऊउझठ या मुळे देखील किमान 10 मजल्यापेक्षा उत्तुंग इमारती उभ्या राहत आहेत. या व्यतिरिक्त या क्षेत्रामध्ये आंतराष्ट्रीय विमानतळ, रेल्वे, मेट्रो रेल्वे, व्यवसायिक हब असे नवे प्रकल्पांचे निर्माण कार्य प्रगती पथावर आहे. या पार्श्वभूमीवर महापालिकेचा अग्निशमन विभाग अधिक बळकट करण्याच्या दृष्टीने डव्हान्स फायर इंजिन, रॅपिड इंटरवेन्शन व्हेईकल, मल्टीपर्पज टर्न टेबल लॅडर,वॉटर बाऊजर (18 किलो लीटर ), डव्हान्सव रेस्क्यु टेंडर अशी विविध आधुनिक तंत्रज्ञानाने युक्त पाच नवी वाहने खरेदी करण्याचा प्रस्ताव आज महासभेत मंजूर करण्यात आला.
पूर्वाश्रमीच्या पनवेल नगर परिषदेमार्फत 6 वाणिज्य संकुलातील 30 वर्षांच्या कालावधीकरिता लिजवर भाडेतत्वावर देणेत आलेले गाळे लिज करारनामा करणेकामी तसेच हस्तांतरीत करारनामा करण्याचा विषय स्थगित करण्यात आला. पनवेल महानगरपालिका हद्दीतील प्रभाग समिती ‘अ’ प्रभाग क्र. 03 मधील तळांना सेक्टर 15 येथे मुस्लिम समाजासाठी दफनभुमी तयार करण्याच्या विषयास महासभेने मंजूरी दिली.