पनवेल महापालिकेची झाडांवर कुऱ्हाड

| पनवेल | प्रतिनिधी |

पनवेल महानगरपालिका हरित पनवेलचे उद्दिष्ट गाठण्यासाठी यंदाच्या वर्षात सव्वा लाख वृक्ष लागवड करणार आहे. परंतु, दूसरीकडे सिडकोच्या संयुक्त विद्यमाने तळोजा येथील घोटचाळ गावाशेजारी सुरू असलेल्या नागरी घनकचरा व्यवस्थापन प्रकल्पाच्या विस्तारामध्ये अडचण ठरणारी 7 ते 10 वर्षे वयाची 224 झाडांची तोड करण्याचा प्रस्ताव पुढे आल्यामुळे पर्यावरण प्रेमींमध्ये चिंतेचे वातावरण आहे.

या वृक्षतोडी बद्दल नागरिकांना माहिती मिळावी यासाठी महापालिका प्रशासनाने नागरिकांच्या हरकती मागविण्याची जाहीर नोटीस बुधवारी प्रसिद्ध केली आहे. या झाडांमध्ये सुबाभूळ, जांभूळ, करंज, काजू, साग, निम, कदंब, सोनमोहर, आंबा, गुलमोहर, बहावा यांसारख्या विविध प्रजातींचा समावेश आहे. ही झाडे घनकचरा व्यवस्थापन प्रकल्पाच्या विस्तारासाठी आवश्यक असलेल्या अतिरिक्त भूखंडाभोवती परिधीय मार्ग आणि जलनिस्सारणासाठी करावयाच्या बांधकामासाठी अडथळा ठरत आहेत. नागरिकांनी या झाडांच्या तोडणीसंबंधी हरकती किंवा सूचना 12 नोव्हेंबरपर्यंत लेखी स्वरूपात सादर कराव्यात, असे आवाहन महापालिकेच्या उद्यान विभाग आणि वृक्ष प्राधिकरणाने केले आहे. मुदतीत हरकती न आल्यास वृक्ष प्राधिकरण झाडतोडीस सशर्त परवानगी देण्याची कार्यवाही करणार असल्याचे स्पष्ट नमूद केले आहे.