| पनवेल | प्रतिनिधी |
नवीन पनवेल ते पनवेल रेल्वे स्थानक जोडणाऱ्या पादचारी पुलावर छप्पर नसल्यामुळे प्रवाशांना भर उन्हाळ्यात प्रचंड त्रास सहन करावा लागत आहे. विशेषतः ज्येष्ठ नागरिक, महिला आणि लहान मुलांसह प्रवास करणाऱ्यांची मोठी गैरसोय होत असून, तातडीने उपाययोजना करण्याची मागणी होत आहे.
नवीन पनवेल आणि पनवेल रेल्वे स्थानकांना जोडणारा पादचारी पूल प्रवाशांसाठी महत्त्वाचा दुवा मानला जातो. मात्र, या पुलावर छप्पर नसल्यामुळे प्रवाशांना उन्हाळ्यात तीव्र उष्णतेचा सामना करावा लागत आहे. कडक उन्हात या पुलावरून प्रवास करणे म्हणजे अक्षरशः जीवघेणे ठरत असल्याच्या प्रतिक्रिया प्रवाशांकडून व्यक्त होत आहेत.
विशेषतः ज्येष्ठ नागरिक, महिला आणि लहान मुलांसह प्रवास करणाऱ्या प्रवाशांना सावलीअभावी अधिक त्रास सहन करावा लागत आहे. अनेकदा प्रवासी उन्हाच्या तडाख्यापासून बचाव करण्यासाठी पुलावर थांबूही शकत नाहीत, त्यामुळे त्यांची अवस्था अधिकच बिकट होते. दररोज हजारो प्रवासी या पुलाचा वापर करतात. मात्र, इतक्या मोठ्या प्रमाणावर वापर होऊनही मूलभूत सुविधांकडे दुर्लक्ष होत असल्याचे चित्र आहे. प्रवाशांच्या सुरक्षिततेसह त्यांच्या सोयीचा विचार करून या पुलावर तातडीने छप्पर उभारणे आवश्यक असल्याची मागणी जोर धरत आहे. प्रवाशांनी संबंधित प्रशासनाकडे वारंवार तक्रारी केल्या असून, लवकरात लवकर या समस्येचे निराकरण करावे, अशी अपेक्षा व्यक्त केली जात आहे. तसेच, रेल्वे प्रशासनाने प्रवाशांच्या मूलभूत गरजांकडे लक्ष देऊन आवश्यक सुविधा उपलब्ध करून द्याव्यात, अशीही मागणी होत आहे.
पुलावर छप्पर नसल्याने प्रवाशांचे हाल
