कशेळे येथील ग्रामीण रुग्णालयात रुग्णांची गैरसोय

नेत्र विभागात डॉक्टरांच नाहीत; स्थानिक आमदारांचे दुर्लक्ष

| नेरळ | प्रतिनिधी |

कर्जत तालुक्यातील ग्रामीण आणि आदिवासी भागातील आरोग्य सेवेसाठी महत्वाचे असलेले कशेळे येथील ग्रामीण रुग्णालय योगदान देत आले आहे. मात्र, तेच ग्रामीण रुग्णालय हे अनेक समस्यांनी व्यापले आहे. काही महिन्यांपासून येथील नेत्र विभागात डॉक्टरच नसल्याचे समोर येत आहे. त्यामुळे नेत्र दोष असलेल्या रुग्णांना कोणतीही सुविधा मिळत नाही. तसेच, स्थानिक आमदार महेंद्र थोरवे यांच्याकडून देखील ग्रामीण रूग्णालयाकडे दुर्लक्ष होत असल्याने रुग्णांकडून नाराजी व्यक्त केली जात आहे.

कशेळे ग्रामीण रुग्णालयात बहुतांशी आदिवासी आणि दुर्गम खेड्यातील रुग्ण येत असतात. आदिवासी भाग असलेल्या कशेळे ते खांडस, कशेळे ते आंबिवली, मेचकरवाडी, तसेच पिंपळोळी, गुढवण, सुगवे, लोभेवाडी, ताडवाडी, वारे, लाखाचीवाडी, जांबुळवाडी अशा अनेक गावांमधून पंधरा ते वीस किलोमीटरचा प्रवास करून या ग्रामीण रूग्णालयात यावे लागते. त्यातच ग्रामीण रूग्णालयातील नेत्र विभागात डॉक्टर नसल्याने रुग्णांकडून नाराजी व्यक्त केली जात आहे. डॉक्टर नसल्याने नागरिकांना भेडसावणाऱ्या डोळ्यांचा प्रश्न गंभीर होत आहे. 31 मार्च रोजी नेत्र विभागातील डॉक्टर निवृत्त झाल्यामुळे गेले सात महिने हे पद रिक्त आहे. त्यामुळे एकप्रकारे नेत्र विभाग सेवा बंद आहेत. नेत्र तपासणी, चष्मे वाटप करणे अशा अनेक प्रकारची नागरिकांची होणारी सोय बंद झाली आहे. त्यामुळे वैद्यकीय अधिकाऱ्यांनी त्वरित लक्ष देऊन नेत्र विभागात डॉक्टर उपलब्ध करून द्यावे. तसेच, नागरिकांची गैरसोय होऊ नये यासाठी स्थानिक आमदार महेंद्र थोरवे यांनी लक्ष घालावे, अशी मागणी आदिवासी भागातून होत आहे.

कशेळे येथील ग्रामीण रुग्णालयात सर्वसामान्य व आदिवासी बांधव मोठ्या प्रमाणात उपचार घेत असतात. येथे प्राथमिक उपचार करण्यासाठी दंत विभागासाठी डॉक्टर उपलब्ध आहेत. परंतु, सात महिने झाले तरी डोळे तपासण्यासाठी व डोळ्यावरील उपचारासाठी डॉक्टर उपलब्ध नाहीत. आम्ही आमच्या डोळ्यांच्या समस्या या रूग्णालयात घेऊन येत असतो. परंतु, येथे डोळ्यांचे डॉक्टर उपलब्ध नसल्याने आम्हाला परत जावे लागते. त्यामुळे येथे डॉक्टर उपलब्ध करून द्यावे, हीच आमची सरकारकडे मागणी आहे.

अनंत भोर्डे,
स्थानिक ग्रामस्थ