बालदिनी वीटभट्टीवर काम करणार्‍या मुलांच्या हाती पाटी पेन्सिल

नेरळ दामतमध्ये सुरु झाला उपक्रम
नेरळ | संतोष पेरणे |
बालदिनी माजी पंतप्रधान स्व.पंडित जवाहरलाल नेहरु यांच्या जयंतीचे औचित्य साधत नेरळ दामत येथील वीटभट्टीवर काम करणार्‍या लहान मुलांनी हाती पाटी पेन्सिल घेत शिक्षणाचा श्रीगणेशा केला.
आदिवासी कातकरी समाजातील कुटुंब वीटभट्टी कामगार म्हणून स्थलांतरण करतात,त्यामुळे त्या आदिवासी कातकरी यांच्या मुलांचे शिक्षण थांबते.अशा मुलांनी शिकले पाहिजे यासाठी नेरळ येथीलकनिष्ठ महाविद्यालयात शिक्षण घेणारी भाविका भगवान जामघरे हि तरुणी त्या मुलांसाठी शाळा सुरु करून शिकवणी वर्ग घेणार आहे. आज बालदिनी वीटभट्टीवरील मुलांची शाळा वीटभट्टीवरच सुरु झाली असून 25 मुले त्या शाळेत येऊ लागली आहेत.
वीटभट्टी कामगार हे दरवर्षी नोव्हेंबर पासून एप्रिल पर्यंत हे कामगार घराबाहेर असतात.अशा कामगारांची मुले त्यांच्या कुटुंबाबातील महत्वाचे भाग असलेल्या मुलांना शाळेला दांडी मारावी लागते. नेरळ येथील भाविका भगवान जामघरे या विद्यार्थिनीला त्या वीटभट्टी मुलांनी पण शिकले पाहिजे यासाठी शिकवणी वर्ग सुरु करण्याचा हट्ट आपल्या वडिलांकडे धरला. नेरळ एसटी स्टॅन्ड येथे रिक्षा चालक असललेले भगवान जामघरे यांनी आपल्या तुटपुंज्या आर्थिक उत्पन्नातून वीटभट्टी वरील मुलांच्या शाळेसाठी पाटी पेन्सिल घेऊन दिल्या आणि आज देशाचे पहिले पंतप्रधान पंडित जवाहरलाल नेहरू यांचा जन्मदिवस देशात बालदिन साजरा होत असताना वीटभट्टी मुलांची शाळा सुरु केली.

शाळेसाठी मदतीचे हात
नेरळ जवळील दामत येथील वीटभट्टी मालक बाबू नजे आणि फैजल खोत यांनी आपल्या वीटभट्टी वरील सर्व शाळाबाह्य मुले यांना एकत्र करण्यासाठी मदत केली. त्या मुलांच्या शाळेसाठी नजे यांनी एक खोली देखील उपलब्ध करून दिली आहे. तेथे बालदिनी 25 वीटभट्टी कामगारांच्या मुलांची शाळा सुरु झाली. शाळेचा पहिला दिवस असल्याने त्या सर्व मुलांना पाटी आणि पेन्सिल देण्यात आली. तसेच त्यांना शाळेची गोडी लागावी यासाठी चॉकलेट आणि बिस्किटे देण्यात आली.त्या मुलांना आठवड्यातून दोन दिवस भाविका जामघरे हि तरुणी शिकवणार आहे.

भाविका ही एप्रिल 2022 पर्यंत सर्व मुलांना ती शिकवणार असून ममदापुर भागात आणखी दोन वीटभट्ट्या असून तेथील मुलांना देखील एकत्र आणून शिकविण्याचा तिचा प्रयत्न आहे.
भगवान जामघरे, पालक

वीटभट्टीवर काम करणारे कामगार यांच्या शाळाबाह्य मुलांना एकत्र करून आपल्या शिक्षणातून वेळ काढून शिकविण्याचा घ्यास घेतलेल्या भाविका जमाघारें हिचे कौतुक कर्जत तालुका पंचायत समितीच्या गट शिक्षण अधिकारी सुरेखा हिवरे यांनी केले आहे. आपण लवकरच त्या स्थलांतरित मुलांच्या शाळेला भेट देऊन अशा मुलांना कशापद्धतीने शिक्षण दिले पाहिजे याचे मार्गदर्शन करणार असल्याची माहिती गट शिक्षण अधिकारी हिवरे यांनी दिली आहे. भाविकाने सुरु केलेल्या वीटभट्टीवरील शाळेत भिवंडी पडघा,खालापूर हाळ,वांगणी आणि कळंब येथील कातकरी कुटुंबातील मुलांचा समावेश आहे.