पिकअप-ईकोची धडक; पाच जण जागीच ठार

चार जण गंभीर जखमी

। धुळे । प्रतिनिधी ।

धुळे जिल्ह्यात भीषण अपघात घडला आहे. पिकअप व्हॅन आणि ईको गाडीची समोरासमोर धडक झाली. या अपघातात पाच जण जागीच ठार झाले. तर, चार जण गंभीर जखमी झाले आहेत. जखमींना तातडीने रुग्णालयात दाखल करण्यात आले आहे.

शिंदखेडा तालुक्यातील दसवेल फाट्याजवळ आज (रविवारी दि. 15) रात्री दोन वाजण्याच्या सुमारास भीषण अपघात झाला. नरडाणा येथे भागवत कथेचा कार्यक्रम आटपून सर्वजण इको व्हॅनने घरी परत जात होते. त्याचवेळी दसवेल फाट्याजवळ भरधाव पिकपने त्यांच्या व्हॅनला जोरदार धडक दिली. ही धडक इतकी जोरदार होती कि, या दुर्घटनेत पाच जणांचा जागीच मृत्यू झाला. तर चार जण गंभीर जखमी झाले आहेत. तसेच, दोन्ही गाड्यांचाही अक्षरशः चक्काचूर झाला आहे.

घटनेची माहिती मिळताच स्थानिकांनी घटनास्थळी धाव घेत जखमींना उपचारासाठी हिरे वैद्यकीय रुग्णालयात दाखल करण्यात केले. तसेच, पिकअप वाहनचालक हा मद्यधुंद अवस्थेत असल्याचे प्रत्यक्षदर्शींकडून सांगण्यात येत असून त्यालाही किरकोळ दुखापत झाली आहे. मात्र, घटनेने सर्वत्र हळहळ व्यक्त केली जात आहे.