माथेरानमध्ये प्लास्टिक रेनकोट बंदीचे तीनतेरा

पर्यटकांकडून सर्रास वापर

| नेरळ | प्रतिनिधी |

माथेरान शहरात पर्यावरण रक्षणासाठी नगरपरिषदेने प्लास्टिक यूज अँड थ्रो रेनकोटवर बंदी घातली असली तरी पहिल्याच पावसात या निर्णयाचे तीनतेरा वाजल्याचे चित्र समोर आले आहे. पर्यटकांकडून मोठ्या प्रमाणात प्लास्टिक रेनकोटचा वापर सुरूच असून, बंदी केवळ कागदावरच असल्याची चर्चा स्थानिकांमध्ये सुरू झाली आहे.
पावसाळ्यात माथेरानमध्ये धुक्याचा आनंद घेण्यासाठी मोठ्या प्रमाणावर पर्यटकांची गर्दी होते. या वेळी अनेक पर्यटक प्लास्टिक रेनकोट खरेदी करून त्याचाच वापर करतात आणि पावसाचा आनंद घेतल्यानंतर ते रेनकोट जंगलात किंवा रस्त्याच्या कडेला फेकून देतात. यामुळे संपूर्ण परिसरात प्लास्टिक कचरा पसरून अस्वच्छता निर्माण होत असल्याचे स्थानिकांचे म्हणणे आहे.

नगरपरिषदेने 13 एप्रिल 2026 रोजी झालेल्या बैठकीत प्लास्टिक रेनकोटवर बंदीचा निर्णय घेतला होता. या निर्णयावर पर्यटन व नियोजन समितीने शिक्कामोर्तब केले होते. व्यापाऱ्यांसोबत बैठका घेऊन अंमलबजावणीची तयारीही दाखवण्यात आली होती. मात्र प्रत्यक्षात पहिल्याच पावसात पर्यटकांकडून मोठ्या प्रमाणात प्लास्टिक रेनकोट वापरले जात असल्याचे दिसून आले.

विशेष म्हणजे, हे रेनकोट पर्यटकांनी बाहेरून आणले नसून माथेरानमधीलच विक्रेत्यांकडून खरेदी केल्याचा आरोप होत आहे. त्यामुळे बंदी असूनही विक्री सुरू असल्याने पालिकेच्या अंमलबजावणीवर प्रश्नचिन्ह निर्माण झाले आहे. स्थानिक नागरिकांनी व्यापाऱ्यांवर नियंत्रण नसल्याचा आरोप करत प्रशासनाच्या भूमिकेवर नाराजी व्यक्त केली आहे.

पर्यटकांकडून फेकले जाणारे प्लास्टिक रेनकोट जागोजागी साचल्याने जंगल परिसरात कचऱ्याचे साम्राज्य वाढले आहे. पर्यावरणपूरक पर्यटनाच्या दृष्टीने घेतलेला निर्णय प्रभावीपणे राबवला जात नसल्याने माथेरानच्या स्वच्छतेवर पुन्हा एकदा प्रश्न उपस्थित होत आहेत. आता पालिका या प्रकारावर ठोस कारवाई करणार का, याकडे सर्वांचे लक्ष लागले आहे.