| पनवेल | विशेष प्रतिनिधी |
कोणतीही बेवारस वस्तू सापडल्यास पोलिसांशी संपर्क साधा अशा सूचना पोलिसांकडून करण्यात आल्या आहेत. मात्र, कामोठे पोलीस ठाणे हद्दीत आढळून आलेल्या बेवारस बॅगबाबत माहिती देणाऱ्यालाच उपदेश करण्याचे काम कामोठे पोलिसांनी केले असून, बस स्टॉपवर बेवारस अवस्थेत असलेल्या दोन बॅग सूचना करणाऱ्यानेच पोलीस ठाण्यात आणल्या असत्या तर काय बिघडले असते, असा उपदेश देण्याचे काम पोलिसांनी केले आहे. त्यामुळे हसावे की रडावे, अशी स्थिती माहिती देणाऱ्याची झाली आहे.
वेळ रविवार (दि.16) सकाळी सव्वाअकराची, स्थळ सायन-पनवेल महामार्गावरील मुंबईच्या दिशेने जाणाऱ्या मार्गावरील कळंबोली बस स्टॉप. स्टॉपवर प्रवाशांसाठी बनविण्यात आलेल्या निवारा शेडमध्ये दोन बेवारस बॅग असल्याचे तिथून प्रवास करणाऱ्या एका स्थानिक पत्रकाराच्या लक्षात आले. बॅगेभोवती माशा भिणभिणत असल्याने याबाबत आजूबाजूला चौकशी केली असता त्या बॅग बेवारसच असल्याचे त्या पत्रकाराच्या लक्षात आले. पनवेल परिसरात काहीच दिवसांपूर्वी डमी हातबॉम्ब मिळाल्याचे, तसेच एका कथित दहशतवादी संघटनेच्या नावाने सुतळी बॉम्ब ठेवून परिसरात घबराट निर्माण केल्याचे प्रकरण ताजे असतानाच बस स्टॉपवर बेवारस बॅग असल्याचे लक्षात आल्याने घटनेचे गांभीर्य लक्षात घेत, घटनास्थळी उपस्थित असलेल्या पत्रकाराने याबाबतची माहिती पोलीस सहाय्यता कक्षास कळवली. यामुळे वेळातच कामोठे पोलीस ठाण्याचे दोन कर्मचारी घटनास्थळी दाखल झाले. त्यांनी बॅगेची तपासणी केली. मात्र, बॅगेत कोणत्याही प्रकारची धोकादायक वस्तू आढळून आली नाही. यामुळे फुकटचा हेलपाटा मारावा लागल्याने संबंधित कर्मचाऱ्यांनी सूचना देणाऱ्या पत्रकाराचीच कानउघाडणी करत तक्रार करण्याऐवजी बेवारस बॅग पोलीस ठाण्यात आणून दिल्या असत्या तर काय बिघडले असते, असा उपदेशाचा डोस सूचना करणाऱ्याला दिला.
परिसरात एखादी बेवारस वस्तू आढळून आल्यास त्या वस्तूला स्पर्श करू नका, त्याबाबत स्थानिक पोलिसांना माहिती द्या, अशा सूचना पोलिसांकडून करण्यात येत असतात. मात्र, पोलिसांच्या या सूचनांचे पालन करणाऱ्यांनाच पोलीस उपदेश करत असतील तर यापुढे अशा घटनांची माहिती पोलिसांना द्यावी की नाही, असा प्रश्न पोलिसांच्या कृतीतून उपस्थित होत आहे.
दरम्यान, बेवारस बॅगेत काय आढळून आले याबाबत माहिती घेतली असता. बॅगेत इलेक्ट्रिशनचे काम करणाऱ्या कारागीरचे साहित्य आढळून आल्याची माहिती पोलिसांकडून देण्यात आली आहे.