अंथ्राट-गुडवण रस्त्याची दुरवस्था

। नेरळ । प्रतिनिधी ।
कर्जत तालुक्यातील अंथ्राट-गुडवण आणि तेथून बोरिवलीकडे जाणार्‍या रस्त्यावर भगदाड पडले आहे. तर नेरळ-गुडवण रस्ता मध्यभागापासून खचला असून या मार्गावरील मोठ्या वाहनांची वाहतूक बंद झाली आहे. दरम्यान, स्थानिक ग्रामस्थांना लांबच फेरा मारत कशेळे-मुरबाड रस्ता किंवा कशेळे-नेरळ या राज्यमार्गावर यावे लागत आहे.

पाच दिवस कोसळलेल्या मुसळधार पावसामुळे कर्जत तालुक्यातील अनेक तालुक्यातील रस्त्यांची वाट लागली आहे. काही ठिकाणी साकव वाहून गेले आहेत तर काही ठिकाणी रस्ते खचले आहेत. त्यात मोठ्या रहदारीचा अंथ्राट भागात खचला आहे. डायरेंची अंथ्राट येथून गुडवण या रस्त्यावर चिल्लार नदीच्या बाजूचा रस्ता किमान 10 मीटर एवढा मुख्य रस्त्यात आणि खाली आणखी मोठ्या प्रमाणावर या रस्त्याचा माती भराव वाहून गेला आहे. त्यामुळे कोणतेही चारचाकी वाहन रस्त्यावरून येणे जाणे बंद झाले आहे. परिणाम अंथ्राट गावातील ग्रामस्थांना गुडवण गावावरून कशेळे भागात वाहने घेऊन जाता येत नाही. कशेळे भागात जायचे असेल तर तळवडे पुलावरून नेरळ येथे येऊन जावे लागत आहे. हा किमान 10 किलोमीटर हुन अधिकचा वळसा आहे. त्याचवेळी गुडवणपासून बोरिवलीकडे जाणार्‍या डांबरी रस्त्यावरच रस्त्याच्या मध्यभागी मोठे भगदाड पडले आहे. त्यामुळे ग्रामस्थांना गुडवण भागातील रहिवाशांना बोरिवली गावावरून कशेळे येथे जाण्यासाठी असलेला रस्तादेखील बंद झाला आहे. त्यामुळे या ग्रामस्थांना सुगवे येथून कशेळे येथे दैनंदिन बाजारहाट करण्यासाठी जावे लागत आहे. नेरळ-पिंपळोली-गुडवण-सुगवे या महत्त्वाच्या रस्त्यावरील वाहतूक काही दिवस बंद असून देखील रस्त्याची अवस्था पाहायला कोणी पोहचले नाही. स्थानिक ग्रामस्थ रवींद्र डायरे यांनी आपली व्यथा सोशल मीडियावर मांडली असून सार्वजनिक बांधकाम विभाग आणि जिल्हा परिषद बांधकाम विभाग रस्त्याच्या मालकीबद्दल टोलवाटोलवी करीत असल्याचा आरोप केला आहे. ग्रामस्थांना रस्त्याची गरज असताना देखील प्रशासन या पुलाकडे दुर्लक्ष करीत असल्याने अंथ्राट, पिंपळोली, तळवडे, कालेवाडी, गुडवण येथील ग्रामस्थ संतप्त झाले आहेत.