कामार्ले ग्रामपंचायतीच्या उपसरपंचपदी शेकापच्या प्रगती शिंगरुत बिनविरोध

| रायगड | जिल्हा प्रतिनिधी |

कामार्ले ग्रामपंचायतीच्या उपसरपंचपदावर शेतकरी कामगार पक्षाने शिक्कामोर्तब केला आहे. मंगळवारी (दि.16) उपसरपंचपदाची निवडणूक प्रक्रिया पार पडली. शेतकरी कामगार पक्षाच्या प्रगती सुभाष शिंगरुत यांचा एकमेव अर्ज या पदासाठी दाखल झाला होता. त्यामुळे ग्रामपंचायत अधिकारी सुवर्णा पाटील यांनी प्रगती शिंगरुत यांची उपसरपंचपदी बिनविरोध निवड झाल्याचे जाहीर केले. शेतकरी कामगार पक्षाचे तालुका चिटणीस सुरेश घरत यांच्यासह महाविकास आघाडीतील उद्धव ठाकरे गटातील शिवसेनेचे नेते कैलास गजने यांच्याकडून तसेच सर्वस्तरातून अभिनंदन करण्यात आले.

कामार्ले ग्रामपंचायतीच्या सदस्यपदाच्या नऊ आणि सरपंच एक अशा दहा जागांपैकी थेट सरपंच आणि सहा सदस्य अशा सात जागांवर शेकापसह महाविकास आघाडीची सत्ता आहे. उपसरपंच म्हणून शिंदे गटातील सूरज राजन गिरी यांच्याकडे जबाबदारी होती. मात्र, सदस्यांना विश्वासात न घेता ते कारभार चालवित होते. त्यामुळे त्यांच्याविरोधात सदस्यांनी अविश्वासाचा ठराव 18 मार्च 2026 मध्ये केला होता. 20 मार्च रोजी झालेल्या बैठकीत हा ठराव मंजूर करण्यात आला. त्यामुळे सूरज गिरी यांचे उपसरपंच पद रद्द झाले. रिक्त असलेल्या उपसरपंचपदासाठी निवडणूक घेण्यात आली. कामार्ले ग्रामपंचायत कार्यालयाच्या सभागृहात मंगळवारी आयोजित करण्यात आलेल्या बैठकीत ही निवडणूक घेण्यात आली.

शेकापच्या प्रगती सुभाष शिंगरुत यांचा उपसरपंचपदासाठी एकमेव अर्ज दाखल झाला. त्यामुळे उपसरपंच म्हणून त्यांची बिनविरोध निवड झाल्याचे ग्रामपंचायत अधिकारी सुवर्णा पाटील यांनी जाहीर केले. प्रगती शिंगरुत यांची उपसरपंच म्हणून निवड झाल्यानंतर त्यांच्यावर अभिनंदनासह शुभेच्छांचा वर्षाव करण्यात आला.
या राजकीय घडामोडीत शिवसेनेचे नेते कैलास गजने यांचा मोलाचा वाटा ठरला आहे. शेकाप तालुका चिटणीस सुरेश घरत यांच्या हस्ते प्रगती शिंगरुत यांचे पुष्पगुच्छ देऊन अभिनंदन करण्यात आले. यावेळी कैलास गजने, ग्रामपंचायत सदस्य अनिता पाटील, प्रगती पाटील, तुकाराम नाईक, गीता नाईक, ऋषीकेश नागावकर यांच्यासह दिपक गोंधळी, दिगंबर गिरी, रवींद्र गजने, आशिष गजने, परशुराम गजने, प्रणय पवार आदी शेकाप, शिवसेना महाविकास आघाडीचे पदाधिकारी, कार्यकर्ते उपस्थित होते. प्रगती शिंगरुत या शेतकरी कामगार पक्षाच्या निष्ठावंत कार्यकर्त्या असून, सलग चार वेळा सदस्य म्हणून त्या निवडून आल्याची माहिती यावेळी देण्यात आली.

शिंदे गटाला दणका
मागील महिन्यात रेवदंडा येथील ग्रामपंचायतीच्या उपसरपंच पदाच्या निवडणुकीत शेकापचे संतोष मोरे यांची बहुमतांनी निवड झाली होती. त्याचबरोबर मंगळवारी (दि. 16) कामार्ले ग्रामपंचायतीच्या उपसरपंचपदाच्या निवडणुकीत शेकापच्या प्रगती शिंगरुत यांची बिनविरोध निवड झाली. शिंदे गटाला या निवडणुकीत दणका मिळाला. या विजयाचा जल्लोष कार्यकर्त्यांनी उत्साहात साजरा केला.