प्रसन्न पुलेकरला 28 जुलैपर्यंत पोलीस कोठडी

फसवणूकप्रकरणी झाली होती अटक

| आगरदांडा | प्रतिनिधी |

मुरुड शहर व ग्रामीण भागातील जनतेस कमीत कमी एक लाख रुपये गुंतवल्यास प्रत्येक महिन्यास दहा हजार रुपये व्याज देण्याचे आमिष दाखवून कोट्यवधी रुपयांची फसवणूक करणारा व तद्नंतर पैसे देण्यास नकार देणारा प्रसन्न पुलेकर यास मुरुड पोलिसांनी काही दिवसापूर्वी अटक केली होती. त्यास न्यायालयात सुरुवातीला हजर केले असता सर्वप्रथम पाच दिवसांची पोलीस कोठडी मिळाल्यानंतर त्यास पुन्हा न्यायालयात हजर केले असता 28 जुलैपर्यंत पोलीस कोठडी देण्यात आली आहे.

मुख्य तक्रारदार महेश भगत यांनी व त्यांच्यासह 136 जणांनी आपली फसवणूक झाल्याची तक्रार मुरुड पोलीस ठाण्यात नोंदवली होती. आतापर्यंत तक्रार दाखल झाल्यानंतर किमान आठ कोटी एक लाख 25 हजार रुपये फसवणूक झाल्याबाबत मुरुड पोलीस ठाण्यात अनेकांच्या तक्रारी प्राप्त झाल्या होत्या. तद्नंतर या फसवणूक रकमेतसुद्धा वाढ झाली असून, अनेक तक्रारदार आता सामोरे येत आहेत. मुरुड पोलीस या फसवणूक प्रकरणाची कसून चौकशी करीत आहेत. लोकांचे पैसे गोळा केल्यावर ते कोठे जमा करावयाचा, या प्रकरणात आणखीन कोणा-कोणाला त्याने पैसे दिले, पुलेकर याचे आणखीन कोण साथीदार आहेत.अशी विविध प्रकरणे शोधून काढण्यासाठी पोलीस तपास सुरू आहे. साथीदार यांना शोधून काढण्यासाठी पोलीस कोठडी आवश्यक असल्याने याचा तपास जलद गतीने सुरू आहे.

मुरुड पोलीस ठाण्याचे पोलीस निरीक्षक परशुराम कांबळे यांच्या मार्गदर्शनाखाली हा तपास सुरू असून, प्रत्येक बाब तपासली जात आहे. कोणतीही बँक नसताना बँकेप्रमाणे आर्थिक व्यवहार करणे हा कायदेशीर गुन्हा असून, या कलमाचासुद्धा या केसमध्ये समायोजन करण्यात आले आहे. फसवणूक त्याचबरोबर अन्य कलमंसुद्धा त्यास लावण्यात आली आहेत. सध्या प्राप्त तक्रारीनुसार आठ कोटी रुपये फसवणूक रक्कम असली तरी सध्या अनेक तक्रारी प्राप्त होत झाल्याने हा आकडासुद्धा वाढत आहे. मुरुड पोलीस याबाबत अधिक तपास करीत असून, लवकरच याबाबतचे गूढ उकलले जाणार आहे.