शेकापकडून विकासकामांना प्राधान्य – गायकवाड

। पोलादपूर । प्रतिनिधी ।
तालुक्यातील ग्रामीण भागात विकासकामे न करता सामाजिक व भावनिक राजकारण करून मते घेणार्‍या नेत्यांना वेळोवेळी सत्ता मिळत असली तरी नेहमीच विकासकामे करून झाल्यानंतर मतांची अपेक्षा केली असून जनतेनेही विकासकामांसाठी आम्हाला साथ दिली असल्याचा अनुभव रायगड जिल्हा मध्यवर्ती सहकारी बँकेचे संचालक एकनाथ गायकवाड यांनी सांगितला.
पोलादपूर तालुक्यातील माटवण ग्रामपंचायत हद्दीतील रायगड जिल्हा परिषदेच्या शाळेच्या नवीन इमारतीचे उदघाटन प्रजासत्ताकदिनाचे औचित्य साधून भाई एकनाथ गायकवाड यांच्याहस्ते करण्यात आले. याप्रसंगी ग्रामस्थमंडळी आणि शेकापक्षाचे कार्यकर्ते आवर्जून उपस्थित होते. याप्रसंगी माटवण ग्रामस्थांनी शाळेची संरक्षक भिंत व शाळेकडे जाण्यासाठी रस्ता शेतकरी कामगार पक्षाच्या माध्यमातून करण्यात यावा अशी मागणी एकनाथ गायकवाड यांच्याकडे केली.