। अलिबाग । वार्ताहर ।
कुष्ठरोग व समाज-कुष्ठरोग स्पर्श कुष्ठरोग निवारण सप्ताह साजरा करण्यासाठी उपजिल्हा रूग्णालय, पेण येथे कार्यक्रमाचे आयोजन बुधवारी (दि.7) करण्यात आले होते. या कार्यक्रमाचे प्रास्ताविक प्रकाश पाटील, माजी तालुका कुष्ठरोग तंत्रज्ञ यांनी केले. यावेळी ते म्हणाले की, 30 जानेवारी हा दिवस महात्मा गांधींचा महानिमार्ण दिन असल्याने प्रसिद्ध फ्रेंच समाजसेवक माऊंट फेरोरो यांनी कुष्ठरोग निवारण सप्ताह साजरा करण्याचे 1954 साली आवाहन केले. त्यानुसार जगभर 30 जानेवारी ते 15 फेब्रुवारीपर्यंत कुष्ठरोग निवारण सप्ताह म्हणून पाळण्यात येतो. महात्मा गांधींनी त्या काळात कुष्ठरोगाचे समूळ उच्चाटन होण्याचे स्वप्न पाहिले होते. त्यांच्या स्वप्नांची पूर्तता करण्यासाठी व त्यांचे प्रेरणेने कुष्ठरोगाचा नायनाट करण्याच्या दृष्टीने केंद्र शासनाच्या मदतीने राज्य शासनाने 1955 साली कुष्ठरोग नियंत्रण कार्यक्रम राबविण्यात सुरूवात केली. हा कार्यक्रम आजपावेतो शासनामार्फत राबविला जात आहे.
या सप्ताहात ग्रामीण तालुका व जिल्हा स्तरावर विविध आरोग्य शिक्षणविषयक कार्यक्रमांचे आयोजन करून शासकीय व स्वयंसेवी संस्था पातळीवर राबविले जातात, तसेच या कार्यक्रमांत समाजाचा सक्रीय सहभाग गरजेचे आहे. म्हणून सर्वांनी आपले कर्तव्य समजून कार्यक्रम यशस्वी होण्यासाठी सहकार्य करावे, असे आवाहन श्री. पाटील यांनी केले.
कार्यक्रमाच्या शेवटी या कार्यक्रमाच्या अध्यक्षा डॉ. संध्या राजपूत यांनी कुष्ठरागाची शासकीय माहिती देऊन कार्यक्रमाचे मार्गदर्शन केले. शेवटी हा कार्यक्रम यशस्वी होण्यासाठी शुभेच्छा दिल्या. या कार्यक्रमासाठी परिचारिका, आरोग्यसेवक, सेविका उपस्थित होत्या. कार्यक्रम यशस्वी करण्यासाठी सहभाग व सहकार्य करण्याचे आवाहन करुन तालुका कुष्ठरोज तंत्रज्ञ मनोज पवार यांनी उपस्थितांचे आभार मानले व कार्यक्रमाची सांगता केली.