उसर गेलविरोधात प्रकल्पग्रस्त आक्रमक

नोकरी, रोजंदारीपासून अद्याप वंचित; साखळी उपोषण, काम बंद आंदोलनाचा इशारा

| रेवदंडा | प्रतिनिधी |

उसर गेल इंडिया लि. कंपनीने प्रकल्पग्रस्त शेतकर्‍यांना नोकरी व रोजंदारीपासून अद्यापि वंचित ठेवल्याने उसर गेल कंपनीस संयुक्त प्रकल्पग्रस्त कामगार आंदोलन समितीचे अध्यक्ष निलेश गायकर यांनी कंपनी गेटसमोर साखळी उपोषण व काम बंद आंदोलनाचा इशारा दिला आहे. दरम्यान, कंपनी अधिकार्‍यांच्या घरासमोर कटोरा घेऊन भीक मागो आंदोलन छेडले जाईल, असेही त्यांनी मुख्य महाप्रबंधक गेल इंडिया उसर यांना दिलेल्या निवेदनात म्हटले आहे. या निवेदनाची प्रत जिल्हाधिकारी रायगड, पोलीस अधीक्षक रायगड, पुनर्वसन अधिकारी व तहसीलदार अलिबाग यांना दिली आहे.

गेल इंडिया लि. कंपनीने 475 एकर जमीन अत्यल्प दराने घेतली, असा प्रकल्पग्रस्त शेतकर्‍यांचा आरोप आहे. मात्र, अद्यापि प्रकल्पग्रस्त शेतकर्‍यांना कायमस्वरूपी नोकरी नाहीच; परंतु कॉन्ट्रॅक्ट बेसिकवरसुध्दा रोजंदारी देण्यापासून स्थानिक प्रकल्पग्रस्तांना वंचित ठेवले आहे. मागील आंदोलनात 150 स्थानिक प्रकल्पग्रस्तांना रोजगार देण्याचे गेल इंडिया लि. कंपनी व्यवस्थापनाने आश्‍वासन दिले होते. परंतु, आश्‍वसनाला केराची टोपली दाखविली असून, अद्यापि प्रकल्पग्रस्ताला नोकरी व रोजंदारी दिली नाही. स्थानिक गेल इंडिया लि. प्रकल्पग्रस्त शेतकरी अद्यापि कायमस्वरूपी नोकरी व रोजंदारीपासून वंचित आहेत. त्यामुळे गेल इंडिया लि. उसर प्रकल्पग्रस्त शेतकर्‍यांनी संप्तत भूमिका घेतली असून, गेल कंपनी गेटसमोर साखळी उपोषण व काम बंद आंदोलन तसेच कंपनी अधिकार्‍यांच्या घरासमोर कटोरा घेऊन भीक मागो आंदोलनाचा इशारा उसर गेल कंपनीस संयुक्त प्रकल्पग्रस्त कामगार आंदोलन समितीचे अध्यक्ष निलेश गायकर यांनी कंपनी व्यवस्थापनास दिले आहे.

शिवाय गेल इंडिया लि. उसरमध्ये फेब्रिकेशन कॉन्ट्रॅक्टमध्ये हेल्पर कामगार स्थानिक असावेत आणि त्यांना ओव्हर टाईम देण्यात यावा. गेल इंडिया व्यवस्थापनाने प्रकल्पग्रस्तांना कायमस्वरूपी नोकरी द्यावी, गेल इंडिया लि. उसर कंपनीत सर्व्हिस कॉन्ट्रॅक्टमध्ये प्रथम प्रकल्पग्रस्त त्यानंतर प्रकल्पग्रस्त गाव, स्थानिक ग्रामपंचायत त्यानंतर बाहेरील कामगार घ्यावेत, स्थानिकांना डॅम्पर वेव्हीकल मशीनरीची सुविधा द्यावी, तसेच प्रलंबित ग्राम सुविधांना लवकरात लवकर मान्यता द्यावी, या मागण्यासुद्धा मान्य कराव्यात, असे निवेदनात म्हटले आहे.

वरील मागण्यांचा पूर्तता न केल्याने प्रकल्पग्रस्त शेतकरी व स्थानिक ग्रामस्थ बेरोजगारीने संप्तत प्रतिक्रिया देत आहेत. त्यामुळे गेल इंडिया लि. उसर प्रकल्पग्रस्त व स्थानिक ग्रामस्थ 23 एप्रिलपासून गेल इंडिया लि. उसर गेटसमोर साखळी उपोषण आंदोलन छेडणार आहे. तरीही कंपनी व्यवस्थापनाने दखल घेतली नाही तर 24 एप्रिल रोजी कंपनी अधिकार्‍यांच्या घरासमोर कटोरा घेऊन भीक मागो आंदोलन छेदणार व त्यानंतर कंपनी गेटसमोर काम बंद आंदोलन अनिश्‍चित काळासाठी चालू राहील, असा इशारा उसर गेल इंडिया कंपनीस संयुक्त प्रकल्पग्रस्त कामगार आंदोलन समितीचे अध्यक्ष निलेश गायकर यांनी दिला आहे.

या आंदोलनास संयुक्त प्रकल्पग्रस्त कामगार आंदोलनास समितीचे अध्यक्ष निलेश गायकर, उपाध्यक्ष दत्तात्रेय ठाकूर, कार्याध्यक्ष अनंत शिंदे, जनरल सेक्रेटरी निखिल पाटील, सेके्रटरी आशिष नाईक, संघटक योगेश गुजर, खजिनदार गिरीष पाटील, सहखजिनदार भरत नाईक, सहसंघटक प्रमोद धसाडे तसेच सदस्य उदय पाटील, किसन घरत, वैभव खंडागळे, जगदीश ठाकूर, महेश शिंदे, प्रपेश पवार, सुभाष पाटील, रामदास शिंदे, मंदार नाईक, संदेश शिंदे, मोहन थळे, अरूण खंडागळे, संतोष पवार, रवींद्र शिंदे, प्रशोभ सांदणकर, रामदास धुमाळ, जगदीश खंडागळे यांचा सहभाग असणार आहे.