गर्भाशय मुखाच्या कर्करोगाबाबत जनजागृती

विवेकानंद एज्युकेशन सोसायटी, इनर व्हील क्लबचा उपक्रम

| चिरनेर | प्रतिनिधी |

विवेकानंद एज्युकेशन सोसायटीच्या कॉलेज ऑफ आर्ट्स, सायन्स अँड कॉमर्सच्या महिला विकास कक्ष आणि इनर व्हील क्लब ऑफ चेंबूर टियारा, डिस्ट्रिक्ट 314 यांच्या संयुक्त विद्यमाने ‌‘प्रतिबंध करा, तपासणी करा, संरक्षण करा’ या संकल्पनेवर आधारित गर्भाशयाच्या मुखाच्या कर्करोगाबाबत जनजागृती कार्यक्रम आयोजित करण्यात आला. युवक-युवतींमध्ये या आजाराचा प्रतिबंध, एचपीव्ही लसीकरणाचे महत्त्व आणि वेळेवर तपासणीबाबत जागरूकता निर्माण करणे हा या उपक्रमाचा उद्देश होता.

कार्यक्रमाला 192 विद्यार्थी, प्राध्यापक आणि इनर व्हील क्लबचे प्रतिनिधी उपस्थित होते. तसेच इनर व्हील झोन 4 मधील सुमारे 30 सदस्यांनीही सहभाग घेतला. प्रतिबंधात्मक आरोग्यसेवेबाबत जनजागृती करण्याच्या उद्देशाने आयोजित या उपक्रमाला उत्स्फूर्त प्रतिसाद मिळाला. ज्येष्ठ प्रसूती व स्त्रीरोग तज्ज्ञ डॉ. मीनाक्षी राव (एमबीबीएस, एमडी, डीजीओ) यांनी मार्गदर्शन करताना गर्भाशयाच्या मुखाच्या कर्करोगाची कारणे, लक्षणे आणि जोखीम घटक याबाबत सविस्तर माहिती दिली. वेळेवर तपासणी, लवकर निदान आणि एचपीव्ही लसीकरण हे या आजाराच्या प्रतिबंधासाठी महत्त्वाचे असल्याचे त्यांनी स्पष्ट केले. या आजाराबाबतचे गैरसमज दूर करण्याबरोबरच महिला आणि पुरुषांमध्ये एचपीव्हीविषयी जागरूकता वाढविण्याची गरजही त्यांनी व्यक्त केली.

यावेळी महाविद्यालयाच्या प्राचार्य डॉ. अनीता कंवर म्हणाल्या की, शिक्षण म्हणजे केवळ शैक्षणिक ज्ञान देणे नसून विद्यार्थ्यांना निरोगी जीवनासाठी आवश्यक माहिती आणि आरोग्यविषयक जागरूकता देणेही महत्त्वाचे आहे. अशा उपक्रमांमधून विद्यार्थी सुजाण निर्णय घेऊन कुटुंब आणि समाजात आरोग्य जनजागृतीचे दूत बनतील, असा विश्वास त्यांनी व्यक्त केला. या उपक्रमासाठी इनर व्हील क्लब ऑफ चेंबूर टियारा आणि डॉ. मीनाक्षी राव यांचे त्यांनी आभार मानले. कार्यक्रमाच्या समारोपावेळी विद्यार्थ्यांनी एचपीव्ही लसीकरण, नियमित तपासणी आणि प्रतिबंधात्मक आरोग्यसेवा याबाबत तज्ज्ञांशी संवाद साधला. आरोग्यतज्ज्ञ, सामाजिक संस्था आणि विद्यार्थ्यांना एका व्यासपीठावर आणणाऱ्या या उपक्रमातून आरोग्यविषयक जनजागृतीसोबतच सामाजिकदृष्ट्या जबाबदार नागरिक घडविण्याचा संदेश देण्यात आला.