पुणे हादरलं! अल्पवयीन मुलीचे अपहरण करून अत्याचार

| पुणे | प्रतिनिधी |

पुण्यात एका 11 वर्षीय मुलीचे अपहरण करून तिच्यावर लैंगिक अत्याचार करण्यात आल्याची धक्कादायक घटना पुण्यातील वारजे भागात घडली आहे. शुक्रवारी (दि.21) रोजी दुपारी साडेबाराच्या दरम्यान अल्पवयीन मुलगी दुकानात जात होती. यावेळी दोघांनी तिला जबरदस्तीने दुचाकीवर बसवून अपहरण केले. त्यानंतर लॉजवर नेत तिच्यावर लैंगिक अत्याचार केला. याप्रकरणी अपहरण करणार्‍या दोघांसह लॉजच्या मालकासह तेथील मॅनेजरवर गुन्हा दाखल करण्यात आला आहे. याबाबत पीडितेच्या वडिलांनी वारजे माळवाडी पोलिस ठाण्यात तक्रार दाखल केली आहे. राहुल गौतम (रा. वारजे), अविनाश डोमपल्ले (24) रा. वारजे, पिकॉक लॉजचा मालक भगवान दत्ता मोरे व लॉजचा मॅनेजर टिकाराम चपाघई यांच्यावर गुन्हा दाखल केला आहे.

मिळालेल्या माहितीनुसार, शुक्रवारी (दि.21) रोजी दुपारी साडेबारा वाजण्याच्या सुमारास साडेअकरा वर्षाची मुलगी रस्त्यावरून दुकानात जात होती. या वेळी आरोपी राहुल गौतम आणि त्याचा साथीदार मित्र अविनाश डोमपल्ले या दोघांनी तिला जबरदस्तीने दुचाकीवर बसवून अपहरण केले. त्यानंतर ते तिला उत्तमनगर येथील पिकॉक लॉजवर घेऊन गेले. तेथे राहुल गौतम याने तिला तू माझ्याशी लग्न कर नाहीतर तुला मारून टाकेन अशी धमकी दिली. त्यानंतर तिच्यावर बलात्कार केला. मुलगी अकरा वर्षांची असतानाही आरोपी राहुल याने तिच्यावर बलात्कार केला होता, असे तक्रारीत म्हटले आहे. तर अविनाश डोमपल्ले याने, तू राहुलसोबत लग्न कर नाहीतर वाईट परिणाम होतील, अशी धमकी दिली. तर भगवान मोरे व टिकाराम चपाघई यांनी मुलगी अल्पवयीन असतानाही तिच्याबाबत कोणतीही खात्री न करता तिला राहुल याच्यासोबत खोली देण्यास हरकत घेतली नाही. त्यामुळे या प्रकरणात चौघांवर गुन्हा दाखल केला आहे. पुढील तपास वारजे माळवाडी पोलिस करत आहेत.