पुण्याच्या अकतसुकी संघाने विजेतेपद पटकावले

पीडीएफए लेजेंड्स करंडक प्रौढ गट फुटबॉल अजिंक्यपद स्पर्धा

| पुणे | प्रतिनिधी |

पुणे जिल्हा फुटबॉल संघटना तर्फे आयोजित दुसऱ्या पीडीएफए लेजेंड्स करंडक प्रौढ गटाच्या फुटबॉल अजिंक्यपद स्पर्धेत पुण्याच्या अकतसुकी संघाने मुंबईच्या चेंबुर ओएस संघाचा टायब्रेकमध्ये 4-3 असा पराभव करून विजेतेपद संपादन केले.

वानवडी येथील टर्फ-अप मैदानावर झालेल्या या स्पर्धेच्या अंतिम सामना अतिशय चुरशीचा झाला. सामन्याच्या 9 व्या मिनिटाला सुरज शेट्टी याने गोल करून चेंबुर संघाचे खाते उघडले. त्यानंतर अनुप नायर याने गोल करून अकतसुकी संघाला बरोबरी गाठून दिली. कृष्णा नायडू याने 27 व्या मिनिटाला गोल करून चेंबुर संघाला पुन्हा आघाडीवर नेले. जेसन वाझ याने 36 व्या मिनिटाला गोल करून अकतसुकी संघाला 2-2 अशी बरोबरी गाठून दिली. पूर्ण वेळ ही बरोबरीची कोंडी कायम असल्याने टायब्रेकपद्धतीचा अवलंब करण्यात आला. टायब्रेकमध्ये चेंबुर ओएसकडून कृष्णा नायडू याने तर, अकतसुकी संघाकडून विजयान अर्लंड आणि शनुप नायर यांनी गोल नोंदवून संघाचा विजय निश्चित केला.

स्पर्धेचे पारितोषिक वितरण स्पर्धेचे प्रायोजक आणि काका हलवाई उद्योग सुमहाचे संचालक समीर गाडवे आणि अस्मित फाटक, नगरसेवक साहील केदारी, शिवाजी केदारी, मुरलीधर कचरे, पीडीएफएचे सचिव प्यारेलाल चौधरी, पीडीएफएचे उपाध्यक्ष प्रदीप परदेशी, सीईओ अक्षय चौधरी यांच्या हस्ते करण्यात आले. यावेळी पीडीएफएचे समिती सदस्य परेश शिवलकर, रवि भागसिंग, मॅथ्यु सुसैनाथन, ॲड. इशान कोल्हटकर आदि प्रमुख पाहूणे उपस्थित होते.

विजेत्यांना 25 हजारांचे पारितोषिक
स्पर्धेतील विजेत्या अकतसुकी पुणे संघाला करंडक आणि 25 हजार रूपये तर, उपविजेत्या चेंबुर ओएस संघाला करंडक आणि 15 हजार रूपयांचे पारितोषिक देण्यात आले. याशिवाय स्पर्धेत वैयक्तिक पारितोषिकेही देण्यात आली. स्पर्धेत मुंबईचे मदनपुरा युनायटेड, मुंबई मल्लु आणि चेंबुर ओएस यांच्यासह बीडचा बीड लेजेंड्स संघ सहभागी झाले आहेत. याशिवाय अल्फा लेजेंडस ऑरेंज आणि ब्ल्यु, पुणे व्हेटरन्स्‌‍‍, इट्स घाना, ओल्ड राईस, जोगा पुणे अ आणि ब, नो लिमिट्स संघ, अकतसुकी, स्कायहॉक्स्‌‍‍ व्हेटरन्स्‌‍‍, किरकी व्हेटरन्स्‌‍‍ आणि यंग हार्ट्स हे 16 संघ सहभागी झाले होते.