पंजाब किंग्जचा ‌‘जायंट’ विजय

कर्णधाराची ऐतिहासिक खेळी; शतकाच्या जोरावर शानदार विजय

| लखनऊ | वृत्तसंस्था |

यंदाच्या आयपीएल हंगामातील शनिवार दि.23 मे हा दिवस श्रेयस अय्यरसाठी एक ऐतिहासिक दिवस ठरला आहे. पहिल्या सात सामन्यांत अपराजित राहणाऱ्या पंजाब किंग्जचे नेतृत्व करताना, श्रेयसने लखनऊ सुपर जायंट्सविरुद्धच्या एका महत्त्वपूर्ण सामन्यात आपल्या संघाला 7 गडी राखून शानदार विजय मिळवून दिला. तसेच, त्याने आयपीएलच्या इतिहासात 19 हंगामांमध्ये कोणत्याही कर्णधाराला साध्य करता आला नव्हता, असा एक विक्रम प्रस्थापित केला आहे. त्याने अवघ्या 51 चेंडूंमध्ये नाबाद 101 धावांची धडाकेबाज शतकी खेळी साकारली. तसेच, त्याला सामनावीर पुरस्काराने सन्मानित करण्यात आले.

लखनऊच्या एकाना स्टेडियमवर पार पडललेया या सामन्यात लखनऊ सुपर जायंट्सने शेवटच्या साखळी सामन्यात पंजाब किंग्ज समोर 197 धावांचे मोठे लक्ष्य ठेवले. अर्शीन कुलकर्णी (0) व निकोलस पूरन (2) हे अपयशी ठरल्यानंतर जॉश इंग्लिस व आयुश बडोनीने दमदार खेळ केला. या दोघांनी 23 चेडूंत 49 धावांची भागीदारी केली, त्यात आयुषच्या 18 चेंडूंत 43 धावांचा समावेश होता. रिषभ पंत (26) याला मोठी खेळी खेळण्यात पुन्हा अपयश आले. तेच अब्दुल समदने 20 चेंडूंत 37 धावांची नाबाद खेळी केली. त्यानंतर इंग्लिस 44 चेंडूंत 72 धावांची खेळी करताना संघाला त्याने 6 बाद 196 धावांपर्यंत पोहोचवले. यावेळी पंजाबच्या मार्को यान्सेन व युझवेंद्र चहल यांनी प्रत्येकी 2 बळी घेतले.

लक्ष्याचा पाठलाग करताना लखनऊच्या मोहम्मद शमीने पंजाबला 22 धावांवर 2 धक्के दिले. प्रियांश आर्याला शून्यावर बाद केले, तर कूपर कॉनली (18) त्रिफळाचीत झाला. त्यानंतर प्रभसिमरन सिंगने अर्धशतक झळकावून कर्णधार श्रेयस अय्यरसह शतकी भागीदारी केली. श्रेयसनेही 33 चेंडूंत पन्नास धावा पूर्ण केल्या. त्यानंतर दोनवेळा जिवदान भेटलेलेा प्रभसिमरन 39 चेंडूंत 69 धावांवर अर्जुन तेंडूलकरच्या तिसऱ्या षटकात भन्नाट यॉर्कवर पायचीत होऊन बाद झाला. त्यानंतर पंजाबला 30 चेंडूंत 35 धावांची गरज असताना श्रेयसने हात मोकळे करताना शमीच्या षटकात 20 धावा कुटल्या. यावेळी श्रेयसने 51 चेंडूंत आयपीएलमधील त्याचे पहिले शतक पूर्ण केले. त्याने नाबाद 101 धावांसह पंजाबला 18 षटकांत 3 बाद 200 धावा करून विजय मिळवून दिला.

श्रेयस अय्यरचा ऐतिहासिक विक्रम
आयपीएलच्या इतिहासात चौथ्या किंवा त्यापेक्षा खालच्या क्रमांकावर फलंदाजी करताना शतक झळकावणारा श्रेयस अय्यर हा पहिलाच कर्णधार ठरला आहे. यापूर्वी, आयपीएलमधील कर्णधारांनी एकूण 16 शतके झळकावली होती; परंतु, ती सर्व शतके त्यांनी फलंदाजीच्या पहिल्या तीन क्रमांकांवर खेळतानाच पूर्ण केली होती. मधल्या फळीत फलंदाजी करताना शतक झळकावण्याचा हा विक्रम आयपीएलच्या इतिहासात पहिल्यांदाच घडला आहे. श्रेयस अय्यरने नाबाद 51 चेंडूत 11 चौकार व पाच षटकारांसह 101 धावा ठोकल्या. शिवाय, श्रेयस आता केएल राहुल आणि ॲडम गिलख्रिस्ट यांच्यासारख्या मोजक्या खेळाडूंच्या यादीत सामील झाला आहे. पंजाब किंग्जचे कर्णधारपद भूषवताना शतक झळकावणारा तो केवळ तिसराच फलंदाज ठरला आहे. यापूर्वी, 2011 मध्ये गिलख्रिस्टने आणि 2020 मध्ये राहुलने ही कामगिरी करून दाखवली होती.