खारघर-सीबीडी कोस्टल रोडचा प्रश्‍न मार्गी

प्रवाशांची होणार वाहतुक कोंडीतुन सुटका

। पनवेल । वार्ताहर ।

खारघर ते सीबीडी 30 मीटर रुंदीच्या कोस्टल रोड उभारणीला भारत सरकारच्या पर्यावरण, वन आणि हवामान बदल मंत्रालयने परवानगी दिली आहे. यामुळे 8 वर्षांपासून रखडलेल्या खारघर ते सीबीडी खाडीकिनारा कोस्टल रोडचा प्रश्‍न मार्गी लागणार आहे. तसेच, प्रवाशांची वाहतूक कोंडीतून सुटका होणार असून कळंबोली, कामोठे आणि खारघरवासियांना नवी मुंबई विमानतळ गाठणे सोयीचे होणार आहे.

सिडकोने नवी मुंबई प्रकल्प उभारण्याचा संकल्प हाती घेताना तळोजा, कळंबोली आणि खारघरवासियांना नवी मुंबई विमानतळ विना अडथळा जाता यावे यासाठी खारघर ते सीबीडी कोस्टल रोडसाठी 2018 साली निविदा काढण्यात आली होती. या रस्त्याचे 273 कोटीचे कंत्राट एका कंपनीला देण्यात आले होते. मात्र, या प्रकल्पाला पर्यावरण विभागाकडून परवानगीसाठी सिडकोकडून प्रयत्न सुरु होते. मात्र, त्याला यश मिळत नव्हते. अखेर ऑगस्ट महिन्याच्या पहिल्या आठवड्यात केंद्र सरकारच्या पर्यावरण, वन आणि हवामान बदल मंत्रालयाच्या तज्ञ मूल्यांकन समितीने कोस्टल रेग्युलेशन झोन नुसार खारघर ते सीबीडी-बेलापूर दरम्यान उभारल्या जाणार्‍या कोस्टल रोडच्या बांधकामाला परवानगी दिली. यामुळे खारघर ते सीबीडी दरम्यान होणार्‍या वाहतूक कोंडीतून प्रवाशांची सुटका होणार आहे.
पुणे-मुंबईकडे जाणार्‍या नागरिकांना नवी मुंबई पामबीच आणि कोस्टल रोडने थेट खारघर टोल नाक्यावर पर्यंत विना अडथळा येता येणार आहे. खारघर ते सीबीडी सेक्टर-15 खाडीकिनारा अंदाजे 6.96 किलोमीटर अंतराचा कोस्टल रोड आहे. तळोजा-खारघर मधील नागरिकांना सीबीडी, सेक्टर-11 मार्गे नवी मुंबई विमानतळावर विना अडथळा जाता येणार आहे. खारघर-सीबीडी दरम्यान होणारी वाहतूक कोंडी सुटण्यास मदत होणार आहे. कोस्टल रोडमुळे खारघर कार्पोरेट पार्क, फुटबॉल स्टेडियमचा प्रवास सुखाचा होणार आहे. खारघर टोल नाका दरम्यान सायन-पनवेल महामार्गावर पुल उभारुन रस्ता केला जाणारा असल्यामुळे भविष्यात खारघर सेक्टर-15, 16 ते 18 येथील घरांना अधिक मागणी असणार आहे.