पनवेलमधील लॉजवर छापा; पीडित महिलांची सुटका

नवी मुंबई पोलिसांची मोठी कारवाई

। पनवेल । प्रतिनिधी ।

नवी मुंबई पोलिसांच्या गुन्हे शाखेने पनवेल तालुक्यातील शिरढोण येथील ‘हॉटेल क्रांतीवीर लॉजिंग अँड बोर्डिंग’ येथे छापा टाकून सुरू असलेल्या कथित वेश्याव्यवसायाचा पर्दाफाश केला. या कारवाईत दोन पीडित महिलांची सुटका करण्यात आली असून, लॉज व्यवस्थापकासह तिघांविरुद्ध गुन्हा दाखल करून त्यांना अटक करण्यात आली आहे.

पोलिसांनी दिलेल्या माहितीनुसार, गुन्हे शाखेच्या अनैतिक मानवी वाहतूक प्रतिबंधक कक्षाला मिळालेल्या गोपनीय माहितीच्या आधारे सापळा रचण्यात आला. बनावट ग्राहक पाठवून करण्यात आलेल्या कारवाईदरम्यान संबंधित लॉजमध्ये दोन महिलांना वेश्याव्यवसायासाठी ठेवण्यात आल्याचे निष्पन्न झाले.
या प्रकरणी प्रकाश गणेश गुप्ता (लॉज व्यवस्थापक), अनजर फकीर शेख (महिला पुरवठादार) आणि प्रियांजन लखोराय कुमार राय (वेटर) यांच्याविरुद्ध पनवेल शहर पोलीस ठाण्यात गुन्हा दाखल करण्यात आला आहे. तिन्ही आरोपींना अटक करण्यात आली असून, न्यायालयाने त्यांना पोलीस कोठडी सुनावली आहे. सुटका करण्यात आलेल्या दोन्ही महिलांना आवश्यक संरक्षण व मदत उपलब्ध करून देण्यात आली असून, या प्रकरणाचा पुढील तपास पनवेल शहर पोलीस ठाण्याकडून सुरू आहे. ही कारवाई नवी मुंबई पोलीस आयुक्तालयाच्या मार्गदर्शनाखाली गुन्हे शाखेच्या अनैतिक मानवी वाहतूक प्रतिबंधक कक्षाच्या पथकाने यशस्वीरीत्या पार पाडली.