सुखकर प्रवासासाठी रायगड पोलीस सज्ज

मुंबई-गोवा महामार्गावर तिसर्‍या डोळ्याची गस्त

। गडब । वार्ताहर ।

गणेशोत्सवानिमित्त मुंबई ठाण्यात राहणारे चाकरमानी कोकणात येण्यास सुरुवात झाली आहे. यावेळी गणेशभक्तांचा प्रवास सुखकर होण्यासाठी मुंबई-गोवा महामार्गावर वाहतुकीचे नियंत्रण करण्यासाठी रायगड पोलीस प्रशासन सज्ज झाले आहेत. खारपाडा ते कशेडी घाट दरम्यान 7 विभागात वाहतुकीचे नियोजन केले असून महत्त्वाच्या ठिकाणी सीसीटीव्ही कॅमेरे बसविण्यात आले आहेत. तर, रहदारीच्या महत्त्वाच्या ठिकाणी पोलीस चौक्यांसह, रुग्णवाहीक आणि क्रेनचीसुद्धा व्यवस्था करण्यात आली आहे.

गणेशोत्सव हा कोकणवासीयांचा महत्वाचा सण मानला जातो. यासाठी मुंबई, ठाणे, नवी मुंबई येथून अनेक चाकरमानी हे कोकणातील आपल्या घरी जात असातात. यामुळे मुंबई-गोवा महामार्गावर होणारी वाहतूक कोंडीची समस्या सोडविण्यासाठी रायगड जिल्ह्यातील सुमारे 145 किलोमीटरच्या मार्गावर पोलीस कर्मचारी आणि अधिकारी तैनात करण्यात आले आहेत. तर, रायगड जिल्ह्यातील या मार्गावरील महत्वाच्या ठिकाणी सीसीटीव्ही बसविण्यात आले आहेत. यामुळे वाहतूक नियंत्रणासाठी मदत होणार आहे. या बंदोबस्तात 7 उपविभागिय पोलीस अधिकारी, 11 पोलीस निरिक्षक, 42 सहाय्यक पोलीस निरिक्षक, 82 वाहतुक आमलदार, 211 पोलीस ठाणेकडील आमलदार, 27 वॉकीटॉकी, 10 वायरलेस सेट, 10 टोईग क्रेन, 10 रुग्णवाहिका, 29 सी.सी. टीव्ही कॅमेरे आसणार आहेत.
यासंदर्भात मुंबई-गोवा महामार्गावरील वाहतुक नियंत्रणासाठी केलेल्या उपाययोजनांची व वाहतुक नियंत्रणासाठी नेमणुक केलेल्या पोलीस अधिकार्‍यांची व कर्मचार्‍यांची आढावा बैठक पेण तालुक्यातील गडब येथील काळंबादेवीच्या मंदिराच्या सभागुहात घेण्यात आली होती. यावेळी रायगड पोलीस अधिक्षक सोमनाथ घार्गे, उपविभागिय पोलीस अधिकारी नितिन चौधरी, शिवाजी फडतरे, दौडकर, जिल्हा वाहतुक पोलीस निरिक्षक एस.व्ही. लांडे, वडखळ पोलीस निरिक्षक प्रसाद पांढरे, पेण पोलीस निरिक्षक संदिप बागुल, दादर सागरी पोलीस निरिक्षक नागेश कदम आदिंसह पोलीस अधिकारी व पोलीस कर्मचारी उपस्थित होते.

मुंबई-गोवा महामार्गावरुन गणेश भक्तांना घेऊन अनेक बसेस व छोटी-मोठी वाहने जाणारा आहेत. या गणेशभक्तांचा प्रवास सुखकर होण्यासाठी व गणेश भक्तांच्या प्रवासात कोणताही अडथळा न येण्यासाठी पोलीस कर्मचारी व अधिकार्‍यांनी सर्तक राहा. महामार्गावर शासनामार्फत गणेशभक्तांच्या सोयीसाठी सुविधा केंद्र, वैद्यकीय मदत केंद्र उभारली आहेत त्याची माहीती प्रवाशांना द्या. सहनशिलतेने जबाबदारीने काम पार पाडा. गणेश भक्तांना मदत करा.

– सोमनाथ घार्गे, रायगड पोलीस अधिक्षक