रायगडचा पहिला विजय

। रायगड । क्रीडा प्रतिनिधी ।

महाराष्ट्र क्रिकेट असोसिएशन आयोजित पंधरा वर्षाखालील मुलांच्या आंतरजिल्हा निवड चाचणी क्रिकेट स्पर्धेतील पहिल्या साखळी फेरीच्या सामन्यात रायगडच्या संघांनी पहिल्या डावाच्या आघाडीवर विजय मिळवला आहे. दक्षिण झोन विरूद्ध झालेल्या सामन्यात रायगडच्या विनय शिर्केनी भेदक गोलंदाजी करत दक्षिण झोन संघाचा अवघ्या 71 धावसंख्येवर डाव गुंडाळला. यात विनय शिर्के यांनी 5 फलंदाज बाद केले. त्याला दुसर्‍या बाजूने उदय जोहल यांनी 3 व आदित्य भारती यांनी 2 फलंदाज बाद करत साथ दिली.

प्रतिउत्तर देताना रायगडच्या पवन दामगुडे यांनी 34 तर मधल्या फळीत श्रेय पाटील यांनी 30 धावांचे योगदान संघाला दिले. दुसर्‍या दिवसाअखेर रायगडच्या संघाने 25 षटकांमध्ये सहा गडी गमावत 91 धावा फलकावर लावल्या. सामन्याचा पहिला दिवस पावसामुळे वाया गेला असल्याने सामना पहिल्या डावाच्या आघाडीवर रायगडने जिंकला.

यावेळी, रायगड जिल्हा क्रिकेट असो.चे अध्यक्ष अनिरुद्ध पाटील, सचिव प्रदिप नाईक यांच्यासह सर्व कमिटी सदस्यांनी खेळाडूंचे अभिनंदन केले आहे.

रायगडचा संघ- पृथ्वीराज जावके (कर्णधार), भावेश जाधव, पवन दामगुडे, रुद्र घासे, तनिष्क बिले, हर्षित सिंग, श्रेय पाटील, अंहिक मानकामे, अर्णव साळवी, विनय शिर्के, उदय जोहाल, आदित्य भारती, सुदीप रॉय, आर्यन जोशी. 
राखीव खेळाडू- दिव्यांश चौधरी, सौर्‍याश कर, रिषभ ठाकूर, विराट पाटील, इशन पाठक, इम्मौद्दिन शेख.