वावे कबड्डी स्पर्धेत रासळची बाजी

। पाली/गोमाशी । वार्ताहर ।

रायगड जिल्हा व सुधागड तालुका कबड्डी असो.च्या मान्यतेने भव्य तालुका स्तरीय कबड्डी स्पर्धेचे आयोजन रविवारी (दि.19) श्री भैरीनाथ क्रीडा मंडळ वावे येथे करण्यात आले होते. या स्पर्धेत तालुक्यातील नामवंत 32 संघाने आपला प्रवेश नोंदविला होता. या कबड्डी स्पर्धेसाठी क्रीडाप्रेंमीनी मोठ्या प्रमाणावर गर्दी केली होती.

या स्पर्धेतील अंतिम लढत जय हनुमान क्रीडा मंडळ रासळ आणि स्वयंभू हनुमान चिवे या संघात झाली. या लढतीत जय हनुमान रासळ हा प्रथम क्रमांकाच मानकरी ठरला असून या संघाला रोख रक्कम 15 हजार रु. व आकर्षक चषक देऊन गौरविण्यात आले. तर, द्वितीय क्रमांक स्वयंभू चिवे संघाने मिळवला असून या संघाला रोख रक्कम 10 हजार रु. व आकर्षक चषक देण्यात आले. तसेच, तृतीय क्रमांकांचा मानकरी वरदायिनी राबगाव तर चतुर्थ क्रमांकाचा मानकरी नाथभैरव झाप हे ठरले असून या दोन्ही संघाला प्रत्येकी 7 हजार रु. व आकर्षक चषक देऊन गौरविण्यात आले. या स्पर्धेतील सर्वोत्कृष्ट खेळाडू मनोज लहाने, उत्कृष्ट चढाई सुमित ठाकूर, उत्कृष्ट पक्कड राज भोईर तर, पब्लिक हिरो साहिल जगताप या सर्व खेळाडूंना आकर्षक बक्षिसे देऊन सन्मानित करण्यात आले.