| अलिबाग | विशेष प्रतिनिधी |
सन 2022-23 या कालावधीच्या दरम्यान उत्कृष्ट कामगिरीच्या आधारे राज्यातील सर्वोत्कृष्ट जिल्हा सहकारी बँक म्हणून राज्यातील 31 जिल्हा बँकामधून उत्कृष्ट जिल्हा सहकारी बँक हा पुरस्कार रायगड जिल्हा सहकारी बँकेला गुजरात येथे नाबार्डचे माजी चीफ जनरल मॅनेजर पी.के.अरोरा यांच्या हस्ते प्रदान करण्यात आला. बँकेच्यावतीने हा पुरस्कार बँकेचे उपाध्यक्ष सुरेश खैरे आणि मुख्य कार्यकारी अधिकारी मंदार वर्तक यांनी स्वीकारला.
रायगड जिल्हा सहकारी बँकेने सन 2022-23 या आर्थिक वर्षात आपल्या कामगिरीमध्ये सातत्य राखताना शून्य टक्के नेट एनपीए, कर्जवाटप आणि ठेवींमध्ये झालेली वाढ, बँकेच्या ठेवी आणि कर्जाचे प्रमाण यामधील वाढलेले गुणोत्तर शिवाय मायक्रो फायनान्स क्षेत्रात केलेली लक्षणीय वाढ यामुळे प्रथम क्रमांकाचे पारितोषिक राज्यात मिळवून बँको या राष्ट्रीय पुरस्कारावर शिक्कामोर्तब केले आहे.
रायगड जिल्हा सहकारी बँकेने आधुनिक सेवेबाबत सदैव सकारात्मक भूमिका ठेवून स्वतःच्या मालकीचे डेटा सेंटरपासून ते आजचे युपीआय पेमेंट या सर्वच गोष्टी अंगीकृत केलेल्या असून, त्या आपल्या ग्राहकांपर्यंत पोहोचवल्या आहेत. त्यामुळे बँकेचा असलेला ग्राहक, तर बँकेसोबतच आहे, परंतु नवीन ग्राहकदेखील बँकेसोबत जोडला जात आहे. त्यामुळे आम्हाला अधिक प्रगती साधण्यास संधी मिळत आहेत, असे प्रतिपादन बँकेचे अध्यक्ष आमदार जयंत पाटील यांनी या पुरस्कारानंतर केले. आज देशामध्ये बँकिंग झपाट्याने बदलत आहे. शाखांमध्ये जाणारे ग्राहक कमी होत आहेत, पण बँकेचे ग्राहक मात्र वाढतच आहेत. त्यामुळे या वाढलेल्या ग्राहकांच्या मागणीला वेळीच प्रतिसाद देण्यासाठी अधिक आधुनिक सेवा देणे अत्यावश्यक असून, त्यासाठीसुद्धा रायगड जिल्हा सहकारी बँक तत्पर असेल, असे आमदार जयंत पाटील यांनी सांगितले.
बँकेला पुरस्कार सातत्याने मिळत असताना आनंद नक्कीच वाटतो, पण ही आमच्यावर वाढलेली एक नवीन जबाबदारी आहे. हे ओळखूनच आम्ही आमच्या कामामध्ये सातत्य आणि विश्वासार्हता ठेवत असतो. त्यामुळे या पुरस्काराबद्दल मी बँकेचे चेअरमन आमदार जयंत पाटील यांचे नेतृत्व, सर्व संचालकांची साथ, बँकेचे ग्राहक, सभासद, भागधारक आणि अधिकारी व कर्मचारी यांचे मनापासून आभार मानतो, असे प्रतिपादन यावेळी बँकेचे मुख्य कार्यकारी अधिकारी मंदार वर्तक यांनी केले.
तसेच राज्यातील सहकार क्षेत्रात रायगड जिल्हा सहकारी बँक नावाचा ब्रँड तयार झालेला असताना सहकाराला अधिक समृद्ध करण्याची जबाबदारीदेखील आमची आहे. त्यामुळे छोट्या किंवा कोणत्याही सहकारी संस्थेने रायगड जिल्हा सहकारी बँकेच्या प्रवाहात सामील व्हावे आणि सहकारातून समृद्धीकडे हा संदेश सार्थ ठरवूया, असे आवाहन मंदार वर्तक यांनी उपस्थितांना केले.