वेश्याव्यवसायातून पीडितांची सुटका

अल्पवयीन मुलीसह 6 महिलांचा समावेश

| पनवेल | प्रतिनिधी |

तळोजा एमआडीसीतील एका लॉजमधून वेश्याव्यवसायासाठी ठेवण्यात आलेल्या एका अल्पवयीन मुलीसह 6 पिडीत महिलांची तळोजा पोलिसांनी सुटका केली आहे. त्यात अल्पवयीन मुलीसह दोन बांगलादेशी महिलांचा समावेश आहे. या कारवाईत लॉज मालकासह मॅनेजर आणि सर्व्हिस बॉय विरोधात गुन्हा दाखल करण्यात आला आहे.

अनैतिक मानवी वाहतुक प्रतिबंध कक्षाचे वरिष्ठ पोलीस निरीक्षक पृथ्वीराज घोरपडे यांना, तळोजा एम.आय.डी.सी. येथील हॉटेल नवनाथ इन या लॉजिंगचा मॅनेजर या ठिकाणी वेश्याव्यवसाय करत असल्याची माहिती मिळाली होती. हा मॅनेजर लॉजमध्ये येणाऱ्या ग्राहकाकडुन 2 हजार रुपये घेऊन येथील रूममध्ये ठेवलेल्या महिला दाखवून, त्या महिलांकडून वेश्या व्यवसाय करून घेत होता. दरम्यान, वरिष्ठ पोलीस निरिक्षक घोरपडे यांच्या पथकाने त्या लॉजवर छापा टाकला. त्यावेळी त्यांना 1 अल्पवयीन बांगलादेशी मुलगी व 6 पीडित महिला वेश्यागमनाकरीता ठेवलेल्या सापडल्या. या सहा पीडित महिलांमध्ये 2 बांगलादेशी महिलांचा समावेश होता. तपासादरम्यान, लॉज मालक वसंत शेट्टी, मॅनेजर गिरीश शेट्टी व सर्व्हिस बॉय रोशन यादव यांनी त्यांना वेश्या व्यवसायासाठी वापर केल्याचे निष्पन्न झाले. त्यामुळे या तिघांविरोधात तळोजा पोलीस ठाण्यात गुन्हा दाखल करण्यात आला आहे. ही कारवाई सहायक पोलीस आयुक्त धर्मपाल बनसोडे व गुन्हे शाखेच्या मार्गदर्शनाखाली वरिष्ठ पोलीस निरीक्षक पृथ्वीराज घोरपडे, हवालदार मांडोळे, सविता म्हात्रे, मनिषा पावडे, शिपाई ठाकुर, चव्हाण, पारासुर, कोलते व हाडे यांनी केली आहे.