दुचाकी अपघातात चालक ठार

| पनवेल | प्रतिनिधी |

पनवेल खांदा कॉलनीकडून नवीन पनवेलच्या दिशेने जाणाऱ्या दुचाकीस्वाराचे वाहनावरील नियंत्रण सुटल्याने दुचाकी रस्ता दुभाजकाला धडकून झालेल्या अपघातात दुचाकीस्वाराचा मृत्यू झाला. तर, मागे बसलेला सहप्रवासी गंभीर जखमी झाल्याची घटना नवीन पनवेल येथे घडली. खांदेश्वर पोलीस ठाण्यात याप्रकरणी स्कुटी चालकाविरोधात गुन्हा दाखल करण्यात आला असून, अधिक तपास करण्यात येत आहे.

याबाबतचे वृत्त असे की, गंगाराम विश्वकर्मा (50) असे या अपघातात मृत्यू झालेल्या दुचाकीस्वाराचे नाव असून, ते नवीन पनवेल येथे राहत होते. गंगाराम हे त्यांच्या दुचाकीवरून राम भानसिंग कामी (42) यांना घेऊन जात होते. त्यांची दुचाकी खांदा कॉलनी येथील उड्डाणपूल उतरून पुढे आली असता गंगाराम यांचा वाहनावरील ताबा सुट ल्याने त्यांची दुचाकी रस्ता दुभाजकावर धडकून हा अपघात झाला. या अपघातात गंगाराम व राम हे दोघेही जखमी झाले. त्यानंतर दोघांना वेगवेगळ्या रुग्णालयात उपचारासाठी दाखल करण्यात आले. मात्र, गंभीर जखमी असलेल्या गंगाराम विश्वकर्मा यांचा काही वेळात मृत्यू झाला. तर, राम कामी यांच्यावर उपचार सुरू आहेत. या अपघाताला गंगाराम विश्वकर्मा हे कारणीभूत असल्याने खांदेश्वर पोलिसांनी त्यांच्याविरोधात गुन्हा दाखल केला आहे. पुढील तपास सपोनि उत्तम घेगडमल करत आहेत.