ट्रॅक्टरवरील आरटीओची कारवाई शिथिल

| नेरळ | प्रतिनिधी |

सध्या शेतीची कामे जोरात सुरू असून, जमिनीची मशागत करण्यासाठी ट्रॅक्टर वापरला जात आहे. मात्र, याच शेतकऱ्याच्या अवजारावर विभागीय परिवहन अधिकाऱ्यांकडून दंडात्मक कारवाई सुरू आहे. दरम्यान, अशा ट्रॅक्टरवरील कारवाई शिथिल करावी, असे पत्र कर्जत तहसीलदारांकडून विभागीय परिवहन अधिकाऱ्यांना देण्यात आले आहे. त्यामुळे शेतकऱ्यांच्या ट्रॅक्टरवर आता कोणतीही कारवाई होणार नाही.

कर्जत तालुक्यात शेतकरी वर्ग खूप मोठ्या प्रमाणात असून, पावसाळा सुरू झाल्याने शेतकरी आपल्या शेतीच्या कामासाठी ट्रॅक्टरने शेतावर जात असतात. परंतु, अलीकडे काही दिवसांपासून पनवेल येथील विभागीय परिवहन अधिकारी कार्यालयाकडून शेतीसाठी वापरल्या जाणाऱ्या ट्रॅक्टरवर दंडात्मक कारवाई करण्यात येत होती. त्यामुळे अनेक शेतकरी अडचणीत सापडले असून जमिनीची मशागत करणे कठीण होऊन बसले आहे.अनेक शेतकऱ्यांनी आपल्या शेत जमिनीच्या मशागती साठी ट्रॅक्टर खरेदी केले आहेत. अशावेळी या ट्रॅक्टर वर विभागीय परिवहन अधिकारी पनवेल कार्यालयाच्या माध्यमातून कारवाई सुरू आहे. कर्जत तहसीलदार धनंजय जाधव यांनी तात्काळ सकारात्मक प्रतिसाद देत पनवेल आरटीओ यांना पत्र पाठवून शेतीसाठी जाणाऱ्या ट्रॅक्टरवर कारवाई करू नये, अशी विनंती केली. ही कार्यवाही म्हणजे आपल्या शेतकऱ्यांसाठी एक दिलासादायक पाऊल आहे. प्रशासनाने वेळेवर लक्ष दिले याबद्दल त्यांचे शेतकरी वर्गाने आभार व्यक्त केले.