कोलाड-पुई पुलाची सुरक्षा ऐरणीवर

नवीन बांधकाम 12 वर्षांपासून रखडले

| पाली/बेणसे | प्रतिनिधी |

पुई गावानजीक असलेला महिसदरा नदीवरील ब्रिटिशकालीन पूल वाहतूक व प्रवासाच्या दृष्टीने अत्यंत जीवघेणा व धोकादायक बनला आहे. या पुलाच्या सुरक्षेचा मुद्दा पुन्हा ऐरणीवर आला असून, नवीन पुलाचे काम गेली बारा वर्षे रखडल्याने संताप व्यक्त केला जात आहे.

पनवेल ते इंदापूर या 84 किमीच्या पहिल्या टप्प्याचे काम तब्बल 13 वर्षांपासून रेंगाळले. या मार्गावरील पुलांची काम देखील रखडली आहेत. महामार्गावरील कामे राष्ट्रीय महामार्ग प्राधिकरणाच्या माध्यमातून केली जात आहेत. पुईच्या पुलावरून दिवसरात्र प्रवासी वाहतुकीसह अत्यंत अवजड वाहतूक सुरु असते. अरुंद पूल असल्याने वाहतुकीला देखील वारंवार अडथळा येतो. पुलावर अपघाती घटना देखील घडतात.

या पुलावरून वाहने जाताना जबर हादरे बसतात. पुलावर मोठमोठे खड्डे आहेत, तर पुलाची खालील बाजू खचलेली, पुलाला ठिकठिकाणी तडे गेलेत, सळ्या बाहेर निघालेल्या अवस्थेत आहेत. मुख्य खांब काही घटकेचे सारथी असल्याचे चित्र पहावयास मिळतेय. येथील रहिवाशी संजय मांडलुस्कर म्हणाले की, हा पुल सदयस्थितित खुप धोकादायक बनला आहे. साधारणतः दहा वर्षांपूर्वी याच पुलाच्या बाजूला नवीन पुलाचे काम सुरू करण्यात आले होते. ते काम अद्याप रखडले आहे. या पुलाची धोकादायक स्थिती असताना आजघडीला केवळ मलमपट्टीचे काम केले जातेय, या पुलावरून प्रवास करताना जिव मुठीत घेऊन प्रवास करावा लागतोय. सदर जुना व जर्जर झालेला पूल केव्हाही कोसळून मोठी जीवघेणी दुर्घटना घडू शकते, अशी भीती मांडलुस्कर स्थानिक रहिवाशी यांनी सांगितले.

संबंधित प्रशासन व सरकारने कोणतीही दुर्घटना घडण्यापूर्वी उपाययोजना करावी, नवीन पुलाचे मजबूत व दर्जेदार बांधकाम करून प्रवाशी व वाहनचालक यांचा प्रवास सुखकर व सुरक्षित करण्यासाठी पुढाकार घ्यावा.

सुनिल दळवी, स्थानिक ग्रामस्थ