| कर्जत | प्रतिनिधी |
कर्जत नगरपरिषदेची सर्वसाधारण सभा नगराध्यक्ष सुवर्णा जोशी यांच्या अध्यक्षतेखाली संपन्न झाली. सभेमध्ये कर्जत शहरातील विविध समस्यांवर चर्चा करण्यात आली. ज्या मैदानावर अखंड हरिनाम सप्ताह गेले 37 वर्ष संपन्न होतो. त्या पोलीस ग्राउंडला माऊली मैदान असे नाव देण्याचे ठराव पारित करून तो पुढील मंजुरीसाठी सार्वजनिक बांधकाम विभागाकडे पाठवण्याचे सूचित करण्यात आले. त्याचप्रमाणे कैची घाटास राधाकृष्ण घाट नाव देण्यास सर्वानूमते मंजुरी देण्यात आली.
पाणी पुरवठा कर्जत शहरात होत असताना अनेक प्रभागात कमी दाबाने येतं असल्याने तसेच बरेच ठिकाणी जुने झालेल्या लाईन्स, वाढत्या लोकसंख्येनुसार आवश्यक असणाऱ्या साठवणूक टाक्या, आणि इतर समस्या बघता शासनाकडून नवीन योजना मंजूर करून घेण्यासाठी नगर परिषदेच्या माध्यमातून प्रस्ताव पाठवण्यात आला होता. तांत्रिक मान्यता झाली होती आणि आता त्यास प्रशासकीय मंजुरी मिळाली असून 58.2 कोटी निधी मंजूर झाला, त्याचबरोबर आंबेडकर भवन साठी 5 कोटी आणि स्वर्गीय अनंता काका जोशी भुयारी मार्ग योजनेसाठी (15 कोटी) आलेल्या निधीवरील स्थगिती उठवणे बाबत एम एम आर डी ए आयुक्त यांना मुख्यमंत्र्यांनी आदेशित केलेले असून त्यासाठी नगरसेवक राहुल डाळिंबकर यांनी नगराध्यक्ष तसेच आमदार महेंद्र थोरवे यांच्या अभिनंदनचा ठराव सभागृहात घेतला.
सर्व समशानभूमी, तसेच रस्ते, गटाऱ्याचे कामे लवकरात लवकर पूर्ण करण्यासंदर्भात सूचना करण्यात आल्या. गार्डन आणि कोपरा गार्डनचे मेंटेनन्स करण्यात यावे, खेळणी दुरुस्ती किंवा नवीन लावण्यात यावी अशी ही चर्चा झाली. माऊली निवास यांचे घरपट्टी कमी करण्याबाबत चर्चा करण्यात आली. अनेक विकास कामांसाठी मंजुरी देण्यात आली. भटकी कुत्री प्रश्न जेव्हा नगरसेवकांनी मांडले त्यावेळेस मुख्याधिकारी वैभव गारवे, सुदाम म्हसे यांनी प्राणी मित्र संघटना तसेच मनेका गांधी यांच्या वतीने नगरपरिषदेवर केस दाखल झाली असल्याचे सांगितले, ठेकेदाराला त्यामुळे कुत्रे पकडणारी गाडी फिरवता येत नाही आणि त्यावर निर्बीजीकरण प्रक्रिया ही करता येत नाही असे सांगितले. त्यावर पर्याय मार्ग काढण्यात यावा याबाबत प्रशासन आणि लवकरच योग्य ती कारवाई करावी. मागील वर्षी ‘एक धाव स्वच्छतेसाठी’ मॅरेथॉन स्पर्धेचे आयोजन करण्यात आले. अनेक लोकांचा उत्स्फूर्त सहभाग बघता ती परंपरा पुढे चालू राहावी या उद्देशाने एक धाव आरोग्यासाठी मॅरेथॉन 2024 आयोजित करणे बाबत सर्वानुमते मंजुरी देण्यात आली.
या सभेत सभापती विवेक दांडेकर, वैशाली मोरे तसेच नगरसेवक बळवंत घुमरे, सोमनाथ ठोंबरे, नगरसेविका मधुरा चंदन, भारती पालकर, पुष्पा दगडे यांनी देखील चर्चेत भाग घेतला. यावेळेस नगरसेविका प्राची डेरवणकर, संचिता पाटील,विशाखा जिनगिरे,ज्योती मेंगाळ, हेमंत ठाणगे,नगरपालिका अधिकारी- कर्मचारी वर्ग सदस्य उपस्थित होते.