इर्शाळवाडी दुर्घटनेचा शिरगावच्या सरपंचांना विसर

सिनेकलावंतांच्या उपस्थितीत दणक्यात वाढदिवस

। महाड । प्रतिनिधी ।

इर्शाळवाडी येथे झालेल्या दुर्घटनेचा शिरगावच्या सरपंचांना विसर पडून त्यांनी आपला वाढदिवस सिनेकलावंतांच्या उपस्थितीत दणक्यात साजरा केल्याने तालुक्यात त्यांच्यावर टीकेचा भडिमार होऊ लागला आहे. या घटनेच्या पार्श्‍वभूमीवर अनेकांनी आपला वाढदिवस साजरा केला नाही. मात्र महाड मधील शिरगावमध्ये मात्र वेगळीच धूम पाहायला मिळाली. शिरगावचे सरपंच सोमनाथ ओझर्डे यांचा वाढदिवस मात्र मोठ्या उत्साहात साजरा झाला. विशेष म्हणजे शिवसेना पक्षप्रमुख उद्धव ठाकरे यांनी दरडग्रस्त इरसाल वाडीला भेट देत सरकारवर ताशेरे ओढले असे असताना त्यांच्याच पक्षाचे नेते सिने कलावंतांच्या उपस्थितीत वाढदिवसाचा जल्लोष करीत होते. यामुळे समाजहित जपणारे अशा प्रकारच्या जाहिराती करणार्‍या सरपंच ओझर्डे यांच्या या कृतीवर आणि कार्यक्रमाला उपस्थिती दाखवणार्‍या सिने कलाकार आणि शिवसेना उद्धव बाळासाहेब ठाकरे गटाच्या नेत्यांवर संताप व्यक्त होत आहे.

सामाजिक कार्यात नेहमीच पुढे असणारे सोमनाथ ओझर्डे हे 24 तास जनतेच्या सेवेसाठी तत्पर असतात. परंतु आजच्या कार्यक्रमामुळे परिसरात नाराजी व्यक्त होत आहे. विशेष म्हणजे महाड पासून जवळच असलेल्या तळीये दरड दुर्घटनेला आज दोन वर्षे पूर्ण झाली. आणि त्याच दिवशी ओझरडे आपल्या वाढदिवशी भोजनावळी घालत होते. ओझर्डे यांच्या वाढदिवसाचा जल्लोष सर्वांचेच डोळे दिपवणारा होता. परंतु ही वेळ योग्य नव्हती अशी प्रतिक्रिया जनमानसातून येत आहे. आजच्या कार्यक्रमाला सिने अभिनेते महेश मांजरेकर, अभिनेत्री सिध्दी पाटणे यांनी हजेरी लावली. त्याच बरोबर शिवसेना जिल्हाप्रमुख अनिल नवगणे, संपर्क प्रमुख संजय कदम हेदेखील शुभेच्छा देण्यासाठी हजर होते. त्यांनाही रायगड जिल्ह्यावर आलेल्या संकटाचे भान राहिले नाही याबद्दल आश्‍चर्य व्यक्त होत आहे.