कळंबोलीतील चाळी होणार जलमय

। पनवेल। वार्ताहर ।

पनवेल महापालिकेमार्फत सिडको वसाहतीमधून नवीन रस्ते बांधणी सुरू आहे. त्या अनुषंगाने कळंबोली येथील केएलई कॉलेज ते विसर्जन तलाव रोडपाली, मार्गावर काँक्रिटीकरण न करता डांबरीकरण करण्याची मागणी माजी नगरसेवक खानावकर यांनी पालिकेकडे केली आहे.

आदर्श शहराचे स्वप्न साकारणार्‍या पनवेल महापालिकेने विविध विकास कामामध्ये प्रामुख्याने पनवेल महापालिका क्षेत्रातील सिडको नोडमधील रस्त्यांचे काँक्रिटीकरण करण्याचे काम गेल्या वर्षभरापासून पालिकेने हाती घेतले आहे. त्यामुळे कॉलनीतील मुख्य रस्ते खड्डेमुक्त होणार आहेत. त्याच बरोबर कळंबोली नोडमधील विविध रस्त्यांचे काँक्रिटीकरण व पुनर्पृष्ठीकरण, करण्याचे काम कासव गतीने सुरू आहे. याच कामाचा भाग असलेल्या केएलई कॉलेज ते विसर्जन तलाव रोडपाली मार्गावर काम सुरू आहे.

त्यामुळे या बैठ्या चाळीलगत असलेल्या रस्त्यावरच्या काँक्रिटीकरणामुळे उंची वाढणार आहे. त्यामुळे ठिकाणाहून पाण्याचा निचरा होण्यासाठी जागा उरणार नाही. परिणामी नेहमीच पावसाळ्यात जलमय होणार्‍या या बैठ्या चाळीतील घरांना आणखी पावसाळ्यात घरात पाणी शिरण्याचा त्रास होणार आहे. ही बाब विजय खानावकर यांच्यासह बैठ्या चाळीतील नागरिकांनी पनवेल पालिकेच्या लक्षात आणून दिली आहे. कळंबोली वसाहत ही समुद्रसपाटीपासून खोल असून, दरवर्षी पावसाळ्यामध्ये वसाहतीमध्ये पाणी भरते. मागील वर्षापासून पालिकेने वसाहतीमधील रस्त्यांचे काँक्रिटीकरण सुरू केले आहे. त्यामुळे रस्त्यांची उंची वाढली असून, वसाहती खोल झाल्या आहेत. त्यामुळे यंदाच्या पावसाळ्यात वसाहतींची आणखी दैना होणार आहे. त्यामुळे होल्डिंग पॉन्ड लगतच्या रस्त्याचे काँक्रिटीकरण न करता तो रस्ता डांबरीकरण करावा अशी मागणी पालिकेकडे केली असल्याचे विजय खानावकर यांनी सांगितले.