नंदुरबारमध्ये शाळेची बस दरीत कोसळली; एका विद्यार्थ्यांचा मृत्यू

। नंदुरबार । प्रतिनिधी ।

अक्कलकुवा तालुक्यातील देवगोई घाट परिसरात भीषण अपघात झाला आहे. विद्यार्थ्यांना घेऊन जाणारी एक स्कूल बस अंदाजे शंभर ते दीडशे फूट खोल दरीत कोसळली. या दुर्घटनेत एका विद्यार्थ्याचा मृत्यू झाला असून, अनेक विद्यार्थी गंभीर जखमी झाले आहेत. खोल दरीत कोसळलेल्या बसमध्ये दबल्याने विद्यार्थ्यांचा मृत्यू झाला आहे.

मोलगी गावातील विद्यार्थी नेहमीप्रमाणे बसने अक्कलकुवाकडे निघाले होते. देवगोई घाटातील आमलिबारी परिसरात पोहोचली असता चालकाचे बसवरील नियंत्रण सुटले. काही क्षणांतच बस खोल दरीत कोसळली. हा अपघात इतका भीषण होता की बसचा चक्काचूर झाला असून, काही विद्यार्थी बसखाली दबल्याचे प्राथमिक वृत्त आहे. स्थानिक ग्रामस्थांनी तत्काळ घटनास्थळी धाव घेत बचावकार्य सुरू केले. ग्रामीण पोलीस व अग्निशामक दलालाही तातडीने माहिती देण्यात आली. स्थानिकांच्या मदतीने जखमींना बाहेर काढून अक्कलकुवा ग्रामीण रुग्णालयात दाखल करण्यात आले आहे. काही विद्यार्थ्यांची प्रकृती चिंताजनक असल्याची माहिती आहे. अपघातग्रस्त बसमध्ये एकूण 20 ते 30 विद्यार्थी असल्याचे सांगण्यात येत आहे. अक्कलकुवा परिसरात या अपघातामुळे एकच खळबळ उडाली असून, विद्यार्थ्यांच्या सुरक्षिततेबाबत प्रश्नचिन्ह उपस्थित होत आहे.