शाळकरी मुलीचे फूस लावून अपहरण

आरोपीला ओडीसातून अटक

| पनवेल | प्रतिनिधी |

कामोठे परिसरातून 16 वर्षीय अल्पवयीन शाळकरी मुलीला प्रेमाच्या जाळ्यात ओढून तिला फूस लावून पळवून नेण्यात आल्याची घटना घडली होती. तसेच, तिच्यावर लैंगिक अत्याचार करून तिला गरोदर ठेवण्यात आले होते. या प्रकरणी कामोठे पोलिसांनी आरोपीला ओडीसा येथून मोठ्या शिताफीने अटक करून त्याच्या ताब्यातून पीडित मुलीची सुटका केली आहे. तसेच, तिला तिच्या कुटुंबियांच्या ताब्यात दिले आहे. मुन्ना रविशंकर प्रधान (21) असे अटक केलेल्या आरोपीचे नाव आहे.

मिळालेल्या माहितीनुसार, पीडित मुलगी कामोठे परिसरात आई-वडिलांसोबत राहत असून, शाळेत शिक्षण घेत आहे. त्याच भागात कामानिमित्त राहणाऱ्या मूळच्या ओडीसा राज्यातील मुन्ना प्रधान याच्यासोबत तिचे प्रेमसंबंध जुळले होते. या प्रेमसंबंधाचा फायदा घेत आरोपी मुन्ना प्रधान याने संधी साधून या अल्पवयीन मुलीला फूस लावून तिला पळवून नेले. घरातील मुलगी अचानक बेपत्ता झाल्याचे लक्षात येताच पीडित मुलीच्या कुटुंबियांनी तातडीने कामोठे पोलीस ठाण्यात धाव घेऊन तक्रार दाखल केली. दरम्यान, पीडित मुलीच्या कुटुंबियांनी मुन्ना प्रधानवर संशय व्यक्त केला. त्यानंरत आरोपी मुन्ना प्रधानचा शोध घेण्यास सुरुवात केली. सुरुवातीला त्याचा मोबाईल बंद असल्याने पोलिसांना त्याच्या ठावठिकाणा मिळत नव्हता. मात्र, पोलिसांनी तपास सुरू ठेवला असतानाच, अचानक त्याचा फोन सुरू झाला आणि त्याचे ओडीसा येथील लोकेशन पोलिसांना मिळाले. त्यानंर वरिष्ठ पोलीस निरीक्षक बिमल बिडवे यांच्या मार्गदर्शनाखाली सहाय्यक पोलीस निरीक्षक राकेश पगारे व त्यांच्या विशेष पथकाने तात्काळ ओडीसाकडे धाव घेतली. तिथे त्यांनी अत्यंत गोपनीय पद्धतीने तपास करत मुन्ना प्रधान याला अटक करून पनवेल येथे आणले. त्यांनतर पीडित मुलीची वैद्यकीय तपासणी केली असता मुन्ना प्रधान याने तिच्यावर लैंगिक अत्याचार केल्यामुळे ती गरोदर असल्याचे निष्पन्न झाले. या गंभीर गुन्ह्याची नोंद घेत कामोठे पोलिसांनी मुन्ना प्रधान याच्या विरोधात अपहरणासह बलात्कार आणि पोक्सो कायद्याच्या कलमांखाली गुन्हा दाखल करून त्याला गजाआड केले आहे.