खळबळजनक घटना! मुलीची हत्या करून आईने केली आत्महत्या

| नवी मुंबई | प्रतिनिधी|

घणसोलीतील चिंच आळीत राहणाऱ्या एका विवाहितेने आपल्या सहावर्षीय मुलीची गळा आवळून हत्या केल्यानंतर स्वत: देखील गळफास घेऊन आत्महत्या केल्याची खळबळजनक घटना उघडकीस आली आहे. आजारपणातून आलेल्या नैराशातून या विवाहितेने हा प्रकार केल्याचा प्राथमिक अंदाज पोलिसांकडून व्यक्त करण्यात येत आहे. या घटनेतील मृत विवाहितेचे नाव प्रियांका महादेव कांबळे (25) असे असून, तिच्या मुलीचे नाव वैष्णवी कांबळे असे आहे.

घणसोली गावात चिंचआळी परिसरात महादेव कांबळे हे पत्नी प्रियांका आणि सहा वर्षीय मुलगी वैष्णवी हिच्या समवेत राहत होते. प्रियांका यांना काही आजार होते. त्या आजारामुळे त्या त्रस्त झाल्या होत्या. महादेव कांबळे हे नेहमी प्रमाणे रात्रपाळी वर गेले होते. गुरुवारी (दि.24)सकाळी घरी आल्यावर दरवाजा बंद आढळून आला. कसाबसा दरवाजा उघडून आत प्रवेश केला असता प्रियांका या फॅनला गळफास घेतलेल्या अवस्थेत आढळून आल्या तर सहा वर्षीय मुलगी निपचित पडलेली आढळून आली. दोघींना रुग्णालयात दाखल केले असता डॉक्टरांनी दोघींना मृत घोषित केले. प्रियांका यांना काही आजार असल्याने त्या मानसिक तणावात होत्या. बुधवारी (दि.23) रात्री पती कामावर गेल्यानंतर रात्री घरी माय लेकी दोघीच होत्या. यावेळी प्रियांका यांनी लेक वैष्णवीचा गळा आवळून हत्या केली. त्यानंतर स्वतः ओढणीने गळफास घेऊन आत्महत्या केली. असा पोलिसांनी अंदाज व्यक्त केला आहे. या प्रकरणी रबाळे पोलीस तपास करीत आहेत.